Shillong: Ka Youth Hostel Association of India (YHAI), Ri Bhoi Unit ha ka sien nyngkong ka la pynlong ka jingiaid kjat ne Trekking ha ka 29 tarik Naiwieng 2025 na shnong Moiambei sha ka shnong Kdoh-Hati, Ri Bhoi district.
Kumba 25 ngut ki samla kynthei bad shynrang kila iashim bynta bad ka jingthmu ka prokram ka ban tip ia ki jingdon jingem kiba long ka spah jong ka ‘mei mariang.
Shwa ban iaid kjat ;a kaweh lama u Rangbah shnong barim ka shnong Moiambei u bah Lowis Sohphoh uba ula ai khublei ia ka YHAI kaba pynlong ia katei ka prokram kum kawei na ki lad pynpaw ia ka thain bad ban iada ia ka mariang.
La ioh ruh ka jingkren lyngkot na u Chairman ka Adventure promotion Committee jong ka Youth Hostel Association of India, Meghalaya State-branch bah AM Shadap, uba la batai ia ka jingthmu jong kane ka jingiaid kjat da kaba sumar ia ka mariang, ym ban dih ki jingdih pynbuaid ne bret ki plastik, bilor um bad kiwei kiwei kiba pynjaboh ia ka mariang.
Ia ka prokram la pynkut da ka jingialang ha shnong Kdoh-Hati ban sam syrnod ia ki nongshim bynta bad la ioh ki kyntien kyntu kynpham na u bah A Lawai u Rangbah barim ka shnong Kdoh-Hati uba la ong ba ha kane ka juk mynta bun ki khynnah kim don por ban iaid kjat ne ialehkai namar ki lap miet ban peit mobile.
La ioh ka jingpynshai shaphang u Moiambei uba la tip ruh kum u Mawnguid briew ha ki khanatang mynshwa da u bah L Sohphoh bad shaphang ka shnong Kdoh-Hati kaba ki Syiem hyndai ki ju iaid lyngba da ki hati bad pynlong kum ka jaka shongthait ha katei ka jaka bad ki teh ia u hati ha u maw, kumta mynta la khot kyrteng Kdoh-Hati ia katei ka shnong ha Ri Bhoi District, ki dak ki shin ki sakhi na ki jingthoh ha kitei ki maw ba don ha shnong Kdoh-Hati.
Na Moiambei sha Kdoh Hati, iaid kjat ka YHAI
