Shillong: Ka Khasi Students Union (KSU) mynta ka sngi ka la kynduh ia u myntri ka tnad pule puthi uba dei peit ruh ia ka tnad kam ain u bah Lahkmen Rymbui ban dawa weng noh mardor ia u Vice Chancellor ka National Law University (NLU) ha kaba ka seng ka la ujor hadien ka jinglap jingkynrum kynram lyngba ka RTI.
U General secretary ka seng u samla Donald V Thabah ula ong ba une u VC um don hok shuh ban shong ha shuki namar ki kam leh tuh leh thok jongu bad mynta ka sngi, ka dei ka jingbuddien jong ka seng kaba la ujor kham mynshwa.
Ha kajuh ka por, ka seng ka la ujor ruh ha u myntri ba ka sorkar ka dei ban kyndang noh ia ki briew kiba shong beain ha jaka ka sorkar ha Maxwelton Estate bad ha Mahadev Khola.
U samla Donald ula ong ba ki briew ki bym ithuh ithaw kila wan buhai shnong ha kitei ki jaka. Ula ong ba katkum ki kot ki sla, ka dei tang ka jaka ban mane ha Mahadev Khola hynrei mynta la ieng ki jingtei ban shna iing bad ka KSU ka dawa ba dei ban kyndang noh bad ban ailad tang ban shu mane.
Halor ka jaka ha Maxwelton, u la ong ba ka sorkar ka la jop ia ka mukotduma ia kane ka jaka pyrshah ia uwei u heh saipan bar jylla, bad ka la dei ban kyndang noh mardor ia kiba sah beain.
Weng noh ia u VC ka NLU, kyndang noh ia kiba skud jaka ha Maxwelton bad Mahadev, dawa ka KSU
