Shillong: Ka jingleh rit u MP ka Shillong, u Dr. Ricky Andrew J Syngkon kala khring ia ki paidbah kylleng ban ai ka jingiaroh watla u dei u nongmihkhmat paidbah, uba ioh kyrdan VIP hynrei um ju leh kyreit kumba long kiwei.
Ha ki rynsan social media, la sakhi ba ki paidbah kila ai ka jingiaroh ia u MP ka Shillong hadien ba ula shah bat ha ki pulit ka Ri-Bhoi ha ka por ba ki dang talasi ia ki kali, ha kaba u MP ha jaka ban iaid beit u hiar bad ai khublei syndon ia ki pulit ka Ri-Bhoi kiba la kitkhia shisha ia la ka kamram.
Ha ka miet ka 25 tarik Naiwieng 2025, hapoh ka jingïalam u Senior Superintendent of Police u VS Rathore, ki pulit ka ri Bhoi kila hiar sha ka thaiñ Byrnihat ban pynlong ka jingtalasi lem bad ki dkhot ka Village Defence Party jong ka shnong Lum Nongthymmai Byrnihat.
Katba dang ïaid ka jingtalasi ki pulit ka Ri-Bhoi kila bat ruh ïaka kali u MP ka VPP u Bah Ricky AJ Syngkon katba u dang wanphai na nongbah Delhi, bad kaba kham sngewtynnad shuh shuh ka long ba une u MP u la hiar lang ha katei ka jaka ban ai khublei bad ai mynsiem ïaki pulit ka Ri-Bhoi ban bteng ïa kane ka jingtalasi naka bynta ka jingshngaiñ jong ki paidbah kiba leit ba wan ha shilynter u surokbah National Highway namar ka aiñ kam dei ban noh shilliang haka jingtalasi kampher la ki dei ki VIP ne ki riew paidbah hynrei ban long salonsar ïa baroh.
Haba kren sha ki lad pathai khubor naka liang u Bah Ricky AJ Syngkon u kwah ba kane ka kam bala sdang da ki pulit ka Ri-Bhoi kan treikam ruh ha baroh ki district jong ka jylla khnang ba ki paidbah kin long adkar haba ñiah ïaki kali ban lait na kino kino ki jingjia ba sngewsih
Tuid ki jingiaroh ia u MP ka Shillong Dr. Ricky, ha jaka ban iaid beit, u hiar na kali ban ai khublei ia ki pulit ka Ri-Bhoi
