Shillong: Ka kam ri masi ka dei kawei kaba bsa bad ai jingkyrshan ia ki longïing khamtam ki masi khem dud.
La ioh ban iakren katto katne ki nongri masi khem dud, halor ka jingiaid lynti jongki ha kane ka kam bad kumno ka la ai jingmyntoi shisha ia ki bad ka iing ka sem. Uwei na kita u dei u bah Mairos Pariong uba dei na shnong Nongkrem Kynrud, Eastern West Khasi Hills.
U bah Mairos ula iathuh ba naduh ba u dang khynnah la im ha ka kam ap masi. Ha ka jingshisha, ka kmei jong u ka la phah skul ynda ula khie samla bad ki nonghikai kila pynshong klas A hynrei ka khohsiew jongu ka la takhuh ha ka ben namar ba u la heh, bad nonghikai kila pynshong noh ha klas B. U la iakhun ia ka klas B bad ula pass bad ula kham nang samla shuh shuh bad u la sdang ban mih tmain. Hadien kane u la leit klas I haduh san snem bad hangtag, u la sngew lehrain ba la heh, u pep skul noh syndon.
Dei hane kane, ula shim briew noh ha u snem 1996 bad ula sdang ia ka kam ri masi ha 2012 bad u la don 6 ngut khun bad kiba iarap bha ia u. Ula iathuh ba kane ka kam ri masi khem dud, ka la iarap ia u ban kyrshan ia ka iing ka sem bad ban lait na ki jingjrem mut ban bylla kiwei ki kam.
Kumjuh u bah Mary Wahlang kaba sah ha Mawlai Mawkynroh, ka la iathuh ba nyngkong kam pat nang ban khem dud masi hynrei la ai mynsiem ki ophisar bad ka la pyrshang ban bteng ia kane ka kam. Ka la leit ot phlang hi bad ka la pyrshang hikai niah kali hynrei teng teng ka sngew lehrain hynrei ynda ka la pyrkhat bha ka sngew ba balei ban ieh ia ka kam haba u blei ula bynta ia ka ban trei ia kane ka kam bad mynta ka sngew nguh ba nga lah ban ieng ha ka kjat hapdeng ki jingeh.
Kumjuh u bah George Goldnes Ryntathiang ula ong ba ka kam ri masi khem dud ka dei kaba ai shibun ka jingmyntoi bad ula ong ba ki Khasi kim dei ban tieng ban lehrain namar ba ka dei ka kam kaba ai jingmyntoi, kaba ai jingkyrshan ia ka iing ka sem tangba ka donkam ka jingiai shah bad ka jingtrei minot.
Ia ka sngi khem dud ne ka National Milk Day la rakhe ha ka 26 tarik u Naiwieng bad ka Meghalaya Milk Processing Centre kaba don ha Mawiong ka la rakhe ia kane ka sngi kyrpang ha kaba la wan iashim bynta na ki jaka kiba pher bapher.
Ki la ai ruh ia ka khusnam ba kyrpang sha ki nongri masi kiba la paw ha ka jylla bad ki jingkren jongki kiba lah ban pyn kyrsiew thiah ia kiba bun ba kin lah ban trei ia ka kam ri masi khamtam ha ka juk kyrduh kam kaba mynta.
U Bah L.S. Shangpliang u Director Jong ka Directorate of Dairy Development u la pynpaw ka jingsngewnguh shibun ia ki nongrep kiba long kum u budlum ha ka jylla bad na ka liang ka Directorate kan trei janai ban wanrah bun tylli ki skhim ban ai ha ki nongrep ka jylla baroh kawei
Por shong klas A, la tam ki khohsiew ia ka ben, san snem ha klas B, nga ri masi noh: ka jingiathuh u rangbah na Nongkrem
