Shillong: Ka Meghalaya State Pollution Control Board (MSPCB) ka lah ban tan ia ka kompeni ka sorkar India ka National Highways & Infrastructure Development Corporation Ltd (NHIDCL) sha ka kashari lada kam siew ia ka kuna kumba la pynjari.
Ka MSPCB ka la dain kuna T.15 lak ia ka NHIDCL halor ka jinglap jongka ia ka jingpynjaboh kane ka kompeni ia ki wah khamtam ia ka wah Umngot, kaba dei ka wah kaba pawnam bha ha ka jingkhuid jongka.
U Member Secretary ka MSPCB u Dr. GH Chyrmang haba kren mynta ka sngi, ula ong ba katkum ki kyndon bad ki hukum ka Supreme Court, la ai bor ia ka Board ba kan dain kuna ia kiba pynkhein ia ka mariang.
U la iathuh ba ka Board ka la thaw ia ka Special Task Force (STF) halor kane ka jingujor bad kala hiar ban pyllong ia ka jingjurip ia ka jingtih surok Shillong-Dawki, bad ha ka jingleit jurip, ka Task Force ka la lap ba ki don 3 tylli ki jaka kiba ka kompeni ka la tih surok bad bret pathar ia ki khyndew kaba la ktah ia ki um ki wah bad dei halor kane ba ka Board ka la dain kuna ia ka NHIDCL hynrei kala pyneh bad dawa ban pyllait noh ia kaneka kuna. U la ong ba lada kam siew bad ka pyneh, ka Board kam banse wat ban tan sha ïing Kashari.
Katkum ka jingong u Dr. GH Chyrmang, ka NHIDCL kam shym la aplai wat ia ka Consent to Establish (CoE) bad Consent to Operate (CTO) kaba long katkum ka kyndon ka ain bad kila tih surok pathar, kane ka jingleh kane ka kompeni ka long kumba leh khnang namar ba ha Garo Hills bad ha Ri Bhoi ruh ki leh kumne hi.
U la iathuh dang shen ha ka jingialang kaba khot ka Deputy Commissioner, ki briew ka NHIDCL ki pyrshang beit ban len bad pyneh ba kim leh eiei ban pynjot ban pynjaboh ia ka mariang hynrei haba ki briew ka MSPCB ki sei ia ki sakhi ki satar, kila shu shaiong ngain.
Lah ban tan ka MSPCB ia ka NHIDCL lada pyneh ban ym siew ia ka kuna T.15 lak ba pynjaboh ia ka wah Umngot
