Shillong: Ka jingrai ka cabinet ka sorkar MDA-2 ban pyrkhing ia ka jingtah ïit iong, pynpah siren bad tah kyrteng ha ki kali, ka lah ban ym treikam satia.
Ka jingkylli ka long mano kita kiba dei ki Very very important persons ne VVIP ne ki Very important persons ne VIP. Mano ba ai kyrdan ia ki, hato ym dei ka sorkar hi namar wat ki MLA kiba la rem ne kiba shu long MLA ruh hynrei haba ki don ha ka sorkar, ki buh siren, ki tah ïit iong, ki tah kyrteng sadhai. Ka jingong u myntri rangbah u Conrad K Sangma ba ka don ka Committee kaba khlieh da u Principal ka tnad Transport ban eksamin ia kiba dei ban tah ïit iong, ban buh siren, ka thew ba ka sorkar ka ailad bad kam pyrkhing satia.
Watla ka rai ka dei kaba bha hynrei haduh katno ka lah ka nud shisha ban pyntreikam ia kane ka rai.
Ka jingjyllei ki kali VIP ha Meghalaya ki bym ithuh ithaw shuh, kiba dei hok ne em, kala pynbitar ia ki paidbah namar bunsien kine ki leh baheh ban tynruh bad rung rak rak wat haba khim bad sahkut kali katba ki paidbah ki hap ban ap kmong da ki kynta ban lait block.
Balei kita ki VVIP, ki VIP ki kwah ban tah ïit iong ban ym ba iohi ia ki dur jongki haba ki dei ki shakri paidbah.
Kiei kita ki VIP, VVIP kiba lah ban pynpah siren, tah ïit iong? Ka jingkylli u paidbah ia ka sorkar
