Shillong: Ki nonghikai skul SSA ha ka jylla kin sa ioh tulop thymmai noh naduh u snem ban wan 2026.
Ia kane la iathuh u President ka seng MSSASA u bah Aristotle Rymbai hadien ba la iakynduh ia u Myntri ka tnat Pule Puthi Bah Lahkmen Rymbui mynta ka sngi ban pynnmaw ia ki mat ba ka seng ka la ju rah naduh kham mynshwa.
U bah Aristotle ula ong ba u myntri ula pyntip ia ki, ba ka sorkar ka dang lum jingtip ia ki nonghikai SSA kiba don ha ka kam ha jylla, shwa ban pyntreikam ia ka jingsiew thymmai.
Ula ong ba katkum ka jingong u myntri, ka sorkar ka la kut jingmut ba shwa ka Khristamas kan pynbna ia ka jingsiew thymmai kaban treikam naduh ka 1 tarik Kyllalyngkot 2026.
Halor ka hukum ka Supreme Court ba ki nonghikai ki dei ban pyndep ia ka Teaching Eligibility TesT (TET), u bah Aristotle ula ong ba ka sorkar jylla kan iakren bad ka sorkar India ban pan jingshai halor kane ka TET.
Ki nongialam ka seng kila kyntu ruh ia u myntri ban pynjynsur ia ka rta ki nonghikai kiba la dep don ha ka kam ban ym shah ktah ha ka jingpynbna ka sorkar mynshwa ha snem 2024.
Ha u snem thymmai yn ioh tulop thymmai ki nonghkai SSA
