Shillong: Ki kontraktor kiba pyntrei ia ka skhim sam um, na ka All Jaiñtia Contractor and Supplier Association, kila sah umdum ha ka lynga ka pisa namar ba kim pat ioh lut ia ki bill na ka jingpyntrei ia ka skhim Jal Jeevan Mission (JJM) watla ki la dep ia ki jingtrei nadong shadong.
U President ka seng u Bah Wellcome Langi haba kren sha ki lad pathai khubor mynta ka sngi ula ong ba ka bill kaba dang sah kaba dei ban siew sha ki kontraktor ka la kot sha ka 700 klur tam.
Ula ong ba kumba ka long ha Jaiñtia Hills, na ka RWS Jowai Division jong ka JJM scheme naduh u Iaïong 2024 haduh u Lber 2025, la pyllait tang 100 klur 17 lak tam ha ka jaka 100 klur 71 Lak tam.
Ula ong ba man ka por kila leit kylli leit kynduh ia u Chief Engineer hynrei hap mih thylli khlem ioh eiei ia la ka bynta ba dei hok ban ioh. Hynrei ka jubab kaba ki ioh ka long beit kin sa ioh, kin sa ioh.
Ha ka jingshisha, ki kam ki jam kila dep lut bad la dep wan jurip wat ki third party ruh halor kane hynrei khlem ioh pisa. Kin pan noh da ka RTI khnang ban iashai halor kane ka pisa ha kaba iadei bad kane ka dei ka skhim ka sorkar pdeng kaba la sdang naduh u snem 2019.
Kila kyrpad ia ka sorkar ba kan pyllait noh ia ka bill kaba la sah namar ba bun ki kontraktor kiba la shim ram kila mad ia ki jingeh kaba khraw.
Ki kontraktor ki la ong ba lada ka sorkar kam pyllait ia ka bill, kin ujor wat sha kashari ruh.
‘Da kynduh ki ong sa ioh sa ioh ia ka T. 700 klur tam, ka phet shaei ym tip’, sah umdum ki kontrak ba trei JJM
