Shillong: U Superintendent of Police ka East Khasi Hills, u Bah Vivek Syiem u la ïathuh ki pulit ki dang tohkit halor ka jingkhlad ka samla ban lap ia ka jingshisha.
U SP ula iathuh ba ki pulit ki dang tohkit halor kane ka jingjia, ban lap la ka dei kaba hap hi ne kaba shah khynniat napoh kali, kaba la jia ha ka 7 tarik mynta u Naiwieng, bad katei ka samla ka la khlad noh ha ka 13 tarik ha Woodland Hospital Shillong.
Ki pulit ki dang bishar ruh ïa ki CCTV ki la ïoh. U SP u la pyntip ba ïa mynta une u samla jong katei ka samla, u la ïoh jamin noh.
Katkum ka jingïathuh u Bah Vivek, kane ka samla kaba la khlad ka dang wan na ka jaka khawai ïathoh shong kurim bad la wan shaw da u samla jong da ka kali Alto ML09AF 1961, ha kaba ki la noh sha ka thaiñ Khyndailad, hynrei ynda la poi ha ka thaiñ ba don ka ophis DC ka la hap na kali ha ka por kumba 11:50 mynmiet ha kaba la ïohi ruh da ki katto katne ki briew.
U SP u la ïathuh ruh ba u hynmen jong kane ka samla u la ujor da ka ejahar ha ka 10 tarik Naiwieng, bad ki pulit mynta ki dang tohkit bniah ban lap ïa ka jingshisha baroh.
Ka samla Phidarisha Jyrwa, 26 snem ka la khlad ha ka 13 tarik Naiwieng ha jaka sumar bad ki pulit ki la kem ia u Edward Roger Ryntathiang (36) uba dei u samla jongka halor kane ka jingjia bad ka jingtohkit ka dang iaid ban lap ia ki jingshisha.
Wan shaw u samla na jaka iathoh, ka shah bret ne hap hi, dang peit na CCTV, ong u SP
