Shillong: Ka la mih ka jinghuri hura ha Chembur temple hadien ba kiba leit mane kila lap ia ka dur ka blei thaw Kali ka la shah pynriam kaba iasyriem kum ka Mary, da ka jain, ka panshngiat bad ka dur khynnah.
Kane ka jingjia ka la pynkyndit ia kiba leit mane bad ka video halor kane ka jingjia, ka la saphriang sted bh, kaba la wanrah ka jingbitar.
U Lyngdoh katei ka temple u Ramesh Yogeshwar ula iathuh ha ki pulit ba kane ka blei thaw ka la wan paw ha u ha ka jingphoh sniew bad ka la bthah ia u ban pynriam ia ka ha ka dur ka Mother Mary.” Hynrei kane ka jingleh jongu ka la pynbitar ia kiba leit mane, kiba la kynnoh ia u ba ula niew bein ia ka jingsngew niam bad ula pynmong ia ka jingngeit jongki.
Ki pulit kila thep mukotduma ia kane ka jingjia kaba iadei bad ka jingpynmong ia ka jingsngew niam bad kila kem ia une u Lyngdoh. Ki dang pyllong ruh ia ka jingtohkit halor kane ka jingleh bad ban wad ki don ne em kiba donkti lang.
Ban pynthanda ia ka jingbitar bad ban kiar na ka jingwanrah ia ka jingsngewpher niam, la buh biang ia kane ka blei thaw kumba ka dei da kaba weng noh ia ka jingpynriam ha ka jingdon lang ki pulit, ki bor pyniaid ka temple bad ki nongmane blei. Ki kynhun niam kila kyntu ia ki bor sorkar ban khang lad ia kaba kum kane ka jingjia, ban iada na ka jinglong kyntang jong ka jinglong niam.
Shah kem u Lyngdoh ba pynriam ia ka blei thaw Kali kum ka Mary
