Shillong: Ki nongdie madan ha lynti iaid ha Civil Hospital, Shillong kila pynpaw ba kim hun ia ka jingpynmih kyrteng ka sorkar lyngba ka Shillong Municipal Board namar ba bun kim mih kyrteng.
Katkum ka jingkam jong u secretary ka seng ki nongdie madan, u bah Shane Thabah, kiba mih kyrteng kum ki nongdie madan ha thain Civil ki don tang 14 ngut kiba dei hok na ki 29 ngut katkum ka thup ka sorkar hynrei ha ka jingshisha, ula kam ba ki don haduh 40 ngut eiei.
Ula ong ba kane ka jingleh sorkar, ka long ka bym shai bad kaba lymbrum lymbram namar ba wat ka Town Vending Committee (TVC) ruh kam shym la khot jingialang shwa halor kane.
Ka sorkar jylla ka la pynkhreh shriak ha jaka ka PWD ban pynkynriah noh ia ki nongdie madan na lynti iaid ha Civil Hospital khnang ban pyllait na ka jingwit ki paidbah.
Ha kawei ka liang, ki nongdie madan kila pynpaw ba ki sngew tynnad ba ka sorkar ka pynkynriah ha jaka ka PWD kaba don mar pyrshah ka Civil Hospital tangba kam dei pat ban rah shiphang shato shiphang shato.
Kila pynpaw ba ki kwah ba ka sorkar kan ai da ka jingthoh khnang ba kin long shai halor kane ka bynta.
Lymbrum lymbram ka thup kyrteng ki nongdie madan, bun kiba jah, kam u nongialam
