Shillong: Ka dei ka sien ba nyngkong ha ka jylla ba ka sorkar kan pyllong ia ka jingialang kynhun myntri ne cabinet hapoh ka phyllaw ka Nan Polok.
Mynta ka sngi, ka MDA-2 hapoh ka jingialam u Myntri Rangbah u Conrad K Sangma ka la pyllong ia ka jingialang ka cabinet ha Nan Polok, kaba ju long hapoh Secretariat ne hapoh ïing hynrei la pyllong madan kaba la shna dara.
Shwa ia kane, la ju pyllong ruh ia ka jingialang ka cabinet ha Jowai, Sohra bad Tura tangba ka dei hapoh ïing.
U Myntri Rangbah ula ong ba ka jingpyllong ia ka cabinet ha Nan Polok ka long kaba kyrpang namar ba ka dei ka jaka kongsan ba tap da ki dieng cherry blossom bad kiwei ki tamas akum ka Literary Festival.
Ka long ruh ban mad ia ka lyer pynngad ka tamasa shwa ban wan ka aiom Khristmas kaban long ha kane ka jaka bad ka dei kaba kyrpang kaba shim por saw kynta bad la rai 16 tylli ki mat.
Ha kane ka cabinet la rai ban aiwai noh ia ki jaka ka sorkar kaba don ha Tura sha ki riew shimet kiba la kdud ha ki phew snem ba la leit. Ka GAD ka la pynkhreh ban shu ai wai sha kine ki riew shimet kiba la skud ia ki jaka ka sorkar khnang ban lait na ki jyrwit jyrwat na ka jingiakhun mukotduma.
U Myntri Rangbah u Conrad K Sangma ula ong ba kito ki shnong kiba la mynjur ia kane, ka sorkar kan iaid shakhmat hadien ba la pyllong ia ka jingsngap paidbah bad kito ki bym pat mynjur yn iakren biang. Kine ki jaka ki hap ha ka konstitwensi kaba ma u, u mihkhmat.
Kawei pat ka rai ka long ba ha u snem 2016-17, ka sorkar ka al ai pisa T.5 klur ban thied jaka ia ka sorkar ha ka por ba thaw ia ka North Garo Hills bad ka sorkar ka la ai bor ia u DC ban thied ia ka jaka kaba la ioh ban tei ia ki ophis ha North Garo Hills.
U Myntri Rangbah ula pyntip ruh ba ka jingshim jaka ha Mawkhanu kaba hap New Shillong ha kaba ka don ki lyngkha kba bad ki nongrep kim ai ia ki jaka hynrei mynta ki 17 ngut ki nongrep kila mynjur ban ai ia ki jaka sha ka sorkar. Ka jingheh ka long 48 akar bad la thied ha ka dor 490 shi square feet.
Shuh shuh kawei pat, ka rai ka long ban iaid shakhmat 300 million dollar ka ram na ka World Bank na ka bynta ka Meghalaya Logistics and Connectivity Improvement Project (MLCIP) ha kaba 20 percent yn sei na pla ka sorkar jylla bad ka jingsiew ram kan long 90 percent na ka sorkar India kaba kot kumba 260 million bad 10 percent yn siew ka sorkar jylla kaban long 24 million dorlar. Ha ka 300 US million dollar kan long 2450 klur tyngka ha ka pisa India.
Ka sorkar jylla ka la rai ban pynmih ia ki kyndon na ka bynta kito ki briew kiba lah ban pyndonkam siren, ki iit iong, ki laight saw ruh kumjuh. Ka cabinet ka la rai ban pdiang ia ka SOP khnang ban pyllait ban lait na ki jingpyndonkam.
Ki iit iong kin long tang ia ki z bad z-plus category, ia ki siren yn pyndonkam tang ki pulit, ambulance, kali pynlip ding bad VIP bad kan don ka committee ban bishar nalor kiwei lada donkam ban ai siren. Ia ki light saw ym shah ban pyndonkam tang ki jingthaba kata ruh ka shong ha ka tand Transport ban bishar ia kane. Kiba tah kyrteng ha kali ruh yn dei tang kiba la ioh jingbit.
Halor ka skhim Revamped Distribution Sector Scheme (RDSS), ki longiing ki ioh ding katkum ka kyrteng ha ka khanasumari kaba la rim bad bun kim ioh ding kiba mih thymmai. Ka sorkar pdeng ka la mynjur ia ka jingkyrpad ka sorkar jylla ban kynthup ia kiba khlem pat kynthup halor kane, bad ka jingmang pisa kan long kumba 500 klur tyngka.
Ka sorkar kala rai ruh ban thied jaka ban iakylliang bad ka jaka ki shipai ban pynheh ia ka kad liengsuin ha Umroi bad ka cabinet ka la mynjur ban iaid shakhmat ban thied ia ka jaka. La ai bor ruh ha u Symbud Myntri Rangbah bah Sniawbhalang Dhar ban iasyllok bad ki paidbah, ki shnong halor kane.
Ka cabinet ka la rai ruh ban thied ia ka jaka ha Jongksha na ka bynta ban tei ia ka projek kam jngohkai ha ka jingheh kaban tei lyngba ka PPP mode. Ka thain Jongksha, Syntung, Laitlum, ka thain Mawkynrew ka dei kaba itynnad ban khring ia kiba wankai bad halor kane, ka sorkar ka idonkam ban tei ia ki jingdonkam ki nongjngohkai.
Ka la mynjur ruh ban thied ia ka jaka ha Umpardong, Umden ban tei ia ki projek kam jngohkai ha ka jingmang kaba T. 50 klur, ban khring shuh shuh ia kiba wankai.
Ka la mynjur ruh ia ka Meghalaya Service Rules jong ka tnad ialehkai bad mynta ka sorkar ka la mynjur.
Ka la rai ruh ban tei ia ka Meghalaya Teacher Training Academy kaban ai ka jinghikai kaba kynsai ia ki nonghikai ban peit da ka Society hapoh ka DERT.
Ka cabinet ka la mynjur ruh ban internal revenue generation scheme ia ka Engineering College bad Polytechnic ba kin lah ban pynmih pisa nalade.
Shuh shuh ka la rai ban ai jingbit ban buh ia ka Park University ha Resubelpara ha North Garo Hills kaba dei ka skulbah shimet.
Kiwei pat ki rai ki long ka jingpynkylla ia ka Section 44 ka Meghalaya Value Added Tax, 2003 ha kaba la bujli da ka Central Bonded Warehouse ha jaka ka Bonded Warehouse, kaba mut ba ia ka khana yn khein beit na ka Central Bonded Warehouse ym shuh lyngba ka Bonded Warehouse ban khang lad ka jinglait ei ka khajna.
Bad kawei pat ka dei ka jingpynkylla ia ka Meghalaya Industrial & Investment Promotion Policy. Ha kane ka policy la pynkylla ba ia ki micro industry ne ki karkhana rit la pynhiar ia ka investment ne ka jingbei pisa kaba buh mynshwa na ka 50 sha ka 10 lak khnang ban plie lad ia ki nongseng kam kiba rit kiba na kane ka jylla.
Ka dei ka cabinet ba kyrpang ha Nan Polok, 16 tylli ki rai la mynjur, ong u Conrad
