Shillong: Ka Deputy Commission ka East Khasi Hills Kong Rosett M Kurbah kala pynjari da ka korphiw miet ha shilynter ka khappud ka East Khasi Hills District bad ka Bangladesh.
Kane ka korphiw miet kan treikam hapoh 1 Km na khappud bad ka jingpynjari ka long ban tehlakam ia ka jingwan rung ki riew kiengatiar, ki runar, ki nongkhaii tuh bad ki kam runar ha khappud.
Ha ka jingpynjari kaba pyllait mynta ka sngi, ka 25 tarik Naiwieng 2025, ka DC ka la ong ba ka korphiw miet kan treikam naduh ka por 8 baje mynmiet haduh ka por 6 baje mynstep. La pyntip ba kane ka jingpynjari kan treikam haduh ar bnai kynthih.
Ka la ong ba ka la donkam ban pynjari korphiew namar ka jinglong jingman ha ri Bangladesh, kaba lah ban don ka jingwan rung tuh ki riew runar, ki dkhot jong ki seng kiengatiar , ki nongkhaii tuh bad kino kino ki kam pyntriem ha ki shnong khappud ka India-Bangladesh.
Ka hukum kala khang ia ka iaid ki ieng ki briew kiba don jingthmu ban jam ia ka khappud ha kine ki kynta ba don ka korphiw, ban ialum briew palat ia 5 ngut bad ban rah ia ki tiar pynmynsaw ha khappud nalor ki kam beain kynthup ka jingkhaii ia ki masi, kwai tympew, ki mar khaii, ki biri, sikret , slasha bad kiwei kiwei.
Ka District Magistrate kala pyntip ba kane ka hukum kan treikam noh mardor bad kan neh 2 bnai naduh ba pynmih ia kane ka hukum.
Wat tur hapoh 1 km sha khappud, ioh shah kem, pynjari korphiw ka DC
