Shillong: Ka Meghalaya Human Rights Commission (MHRC) ka la shim kam da Suo Motu pyrshah ïa ka Shillong Civil Hospital bad pan jubab na ka Director ka Health Services (MI) halor ka jingleh torti bad bym suid niew ban ai ka jingsumar kaba sted ia ar ngut ki samla pule kiba mynsaw jur na ka jingjia aksiden ha NEHU dang shen.
Ka Commission ka la phah da ka jingthoh sha ka Director jong ka Health Services (MI) ka Sorkar Jylli bad hukum ban pynlong mardor ïa ka jingtohkit bad ban aiti ïa ka kaiphot sha ka Commission ha lane shwa ka 7 tarik Kyllalyngkot 2026.
Kane ka jingshim mukotduma jong ka MHRC ka dei hadien ba ka mih ha ki lad pathai khubor ba ki nongtrei ka Shillong Civil Hospital kim shym la ai ka jingsumar ba kyrkieh ïa kitei ki samla wat haba ki don hapdeng ka jingphlei snam, Pynban la pynthiah palat shikynta hashwa ban pynkit noh sha Nazareth Hospital.
Lah ban kdew ba ar ngut ki samla pule ka NEHU ka samla Daritngen Pohdukhei bad ka samla Stephanie Shadap kila mynsaw jur hadien ba shah tynrah ha ka kali ha NEHU ha ka 17 tarik mynta u bnai bad ki dang shah sumar ha Nazareth Hospital mynta.
Tan ka MHRC ia ka Shillong Civil Hospital ba leh torti ia 2 ngut ki samla ba mynsaw
