Shillong: Ka jingbujli shuki ha ka UDP ka pyni ba ki dak ki shin kim long kiba sngew tynnad hapoh ka party.
U bah Paul Lyngdoh bad u bah Kyrmen Shylla kiba bam smai myntri na ka UDP ha ka sorkar MDA-2 kila shah pynhap noh jrain hadien ar snem shiteng bad katkum ka jingkam jongki, kam don satia ka jingiakut ha ka party ba kin iasam kylliang.
Dang shen, u bah Paul ula pyllait kdar shabar ba um don jingtip eiei ban don ka jingpynhap ne bujli shuki bad ula pynkynmaw ba wat u President ka UDP u bah Metbah Lyngdoh ula kren shai saw sngi shwa ban bujli shuki, ba ka UDP kam don eiei ka jingthmu ban bujli shuki hynrei ka la long pat da khongpong.
Haba ki nongthoh khubor ki pyrshang ban kylli halor kane ka jingkren u bah Paul, u bah Metbah ula kyntait ba um treh ban kren eiei halor kane ka kam. Ka jingbym treh jong u ban kren sha ki paidbah, ka lah ban don eiei kaba ad phyllung hapoh ka UDP, kaba lah ban sa bthei ha kano kano ka por ha ka pyrthei politik. Ka jingpyllait paidbah u bah Paul ban kren ia ka jingiakren ka party halor kane ka kam khamtam ban kren ia u President, ka lah ban thew sha jngai bad ka por kan sa batai.
Lah ban kdew ba ka UDP kaba don 12 ngut ki MLA, ka ioh shuki ar ngut ha kane ka sorkar MDA-2.
Ha jaka u bah Paul Lyngdoh bad bah Kyrmen Shylla, la bujli u bah Metbah Lyngdoh bad bah Lahkmen Rymbui kum ki myntri ha kane ka sorkar MDA-2 kaba ialam u Myntri Rangbah u Conrad K Sangma ka NPP.
Ha ka jingshisha ka UDP bad ka HSPDP bad kiwei kila pyrshang ban iathaw sorkar hadien ka elekshon 2023 hynrei hadien ba kim lah, kila leit iasnoh lang noh bad ka NPP.
Ki paidbah khamtam na kiwei ki seng sain pyrthei, kila sin la rngop ia ka UDP ba ka dei tang ka seng sdien bos bad shong tnum bus katba shaba ialam ka NPP.
Balei ym treh jubab u President ka UDP ia ka jingkren u bah Paul?
