Shillong: Kano kano ka shnong ka la mih kyrteng namar na kano kano ka daw kaba la pyllong ia ki briew ban khot ia ka kumta.
Ka shnong Demseiñiong kaba don ha sor Shillong ha syndah bad ka Polo, bad ka Urkaliar, ka dei kaba la rim bha ka jingwan thaw shnong naduh mynshwa. Ka don ha ka jaka kaba long dymmiew ha kaba na shiliang ka phang mihngi, la kah ka sharing lum ka Nongrim Maw, Laitumkhrah bad sha sepngi ka long madan ka Pynthorbah.
Ka Demseiniong ruh ka dei kawei na ki dong kaba hap ha ka Dorbar Shnong Laitumkhrah. Mynshwa ka dei kaba shnong kaba ju bna nam bha na ka daw ka jingdon kiba die kyiad pathar hynrei mynta ka la kylla dur bak ly bak lyngba ka jingtrei shitom ka shnong bad ki samla ban pynduh jait ia ka jingdie kyiad beain.
Katkum ka jingiakren bad u Rangbah Dong bah Tony Nongkynrih la iathuh ba ka kyrteng Demseiniong ka mih namar ba katei ka jaka, ka dei kaba bun bsein bha bad haduh mynta haba ki briew ki tih nongrim ban shna ïing, ki mih beit ki bsein rit.
U la ong ba tang shu la shit ka sngi, kine ki bsein ki ia mih bad dei na kane ka daw ba ki riew tymmen mynshwa, ki khot ne ai kyrteng noh kum ka Demseiniong.
Katba u bah Frankly Nongbri u secretary shnong ula iathuh ba mynshwa ki meidot ki iathuh ba ka don ka shyngkiar ha kawei ka jaka ha katei ka shnong ha kaba ju wan u bsein iong ban dem ban thad sngi bad dei na kane ka daw ba la mih kyrteng ka Demseiniong.
Mih ka kyrteng Demseiñiong na ki bsein, ka jingbatai na ki riew rangbah
