Shillong: Ha ka jingbuddien tyngeh ki pulit ia ka jingshah tuh T. 7 klur na surok bah ha ka por myn sngi ha nongbah Bengaluru, ki la ioh kem noh syndon ia u nongtrei barim ka CMS uba la tip kyrteng kum u Xavier bad uwei u pulit langrut uba kyrteng u Annappa, kiba plan ban lute da kaba phah iarap ha ki gang.
Ki pulit kila lap ba u Xavier, uba la phet na ka CMS la shi snem eiei, u ju iakynduh man ka por ia u Annappa uba dang shah pynkynriah na Crime Branch sha ka kam pahara Hoysala ha kaba ula ai ia ki jingtip ba bniah ia ka jingiaid jingieng katei ka kali kit pisa.
Kila ia plan ban lute, ban iaid na ka lynti bad kila phah ia ki gang na Banaswadi ban pyntreikam ia kane ka plan jongki, katba ialade ki ia peit na jngai.
U heh ka Bengaluru South Division ula iathuh ba la ioh kurup biang ₹5.3 klur ka pisa na Andhra Pradesh, ha kaba kila ieh ia ka kali ha Chittoor hadien ba bujli ia u number plat ka UP bad da kaba pyndonkam ban iaid na ki nongkyndong ban lait na ki toll gate ha Mulbagilu bad Hosakote.
Katba sa 2 klur eiei ka pisa kaba jah, la suba kila ai ia ki gang kiba la krad sha Chittoor bad Tirupati. Ki pulit kila kem ruh sa 2 ngut ki briew ha Bengaluru halor ka jingshah ieh katei ka kali bad ki pulit ki dang pyllong ia ka jingthwet kylleng ki jylla ban kem sa kiwei kiba dang leit phet rieh.
Shah kem u nongtrei barim bad u langrut ba rong tuh T.7 klur na kali kit pisa ha Bengaluru
