Shillong: Ka dorbar shnong Mawlynnong, ka la pynbna paidbah ba ka la shim ia ka rai ba naduh u Kyllalyngkot 2026 ter ter, kan khang noh ia baroh man ka sngi Robibar ne sngi u Blei ia kiba wan kai ne tourist.
Ka shnong kan pdiang ia kiba wankai tang naduh ka sngi Nyngkong haduh sngi Saitjain katba ha ka sngi Robibar ne sngi u Blei baroh naduh ki dukan, ki restaurant, ki jaka leit shabar paidbah kin khang noh.
Ka dorbar shnong ka la shim ia kane ka sienjam ka long haden ba la pyrkhat bha halor ki daw ba man ka sngi Robibar, ha Mawlynnong la jan baroh ki leit sha ka jingiaseng ha ki ïingmane la jan baroh shi sngi bad na kane ka daw, kim ym lah ban ai ka jingshakri ia kiba wankai ne pdiang briew kiba wankai. Kane ka la wanrah ka jingeh bad ka jingbym sngew tynnad ia kiba wankai khamtam ia kiba la kham iaw rta bad kane ka lah ban wanrah ia ki ia ka jingsngew bynniaw bad ka jingbym sngew hun bad ka lah ban wanrah ruh ia ka jingpynbudnam sniew ia ka shnong bad ki briew jongka bad ka shnong kam kwah ba kan jia kumta.
Hynrei ka dorbar shnong ka la pynjynsur ia kito kiba la don lypa, kiba la sah miet lypa shwa ka sngi Robibar ha ki Guest House, Homestay ki lah ban sah haduh ka sngi u Blei bad kito kiba wankai kiba kwah ban kam lypa ne book ia ki kamra ha ka miet sngi Robibar ruh ki lah ban leh kumta bad ki lah ban mih noh ruh myn sngi Robibar ne ha ka miet sngi Robibar ruh.
Hynrei kane kan dei ka jingkitkhlieh hi u trai ka Guest House, Homestay. Ia kane ka jingpynbna la soi da u Rangbah Shnong bah Philemon Khonglanoh bad u Secretary bah Remdor Khongthohrem.
Lah ban kdew ba ka shnong Mawlynnong ka la ioh nam kum ka shnong kaba khuid tam ha Asia bad da ki spah ngut ki briew kiba wankai ki tuid sha kane ka shnong man ka sngi.
Man ka sngi u Blei khang noh ka Mawlynnong ia kiba wankai naduh 2026
