Shillong: U MLA ka UDP uba shah pynhap shuki noh, u bah Paul Lyngdoh ula ong ba um khmih lynti ba un shah pynhap shuki ha kane ka sorkar MDA-2 khamtam hadien ba u President ka party UDP u bah Metbah Lyngdoh ula pynpaw sha ki lad pathai khubor ba kam don kano kano ka jingthmu ban bujli shuki, kata saw sngi shwa ban jia pat ka jingbujli shuki myntri.
Haba kren mynta ka sngi, u bah Paul u la ong ba kam don eiei kaban iadei bad ka kam shimet jongu, ban sngewsih halor kane hynrei ka dei ban don ka ethic ne ka nongrim bad kumno ki bat ia ka nongrim ha ka politik namar ba saw sngi shwa ban pynhap shuki, ka UDP ka la rakhe ia ka sngi seng ha kaba u President ula kren shai ba kam don eiei ha ka party ban iabujli myntri.
“Ka CEC ka UDP ruh kaba iakynduh shi bnai shwa ban jia ka jingbujli myntri, ki don ki dkhot kila rah ia kane ba kan don ne em ka jingbujli myntri ha ka UDP bad u President ka UDP uba pyniaid ia ka jingialang, uba la ong ba kam don eiei ka jingbujli myntri bad ula ong ba kan bha ban kylli na ki myntri”, la ong u bah Paul.
Halor ka jingkylli ka dei shisha ba ka lyer ka la saw aba un leit iakhun noh na ka NPP ha ka elekshon kaban sa wan, u bah Paul ula ong ba ka dang kloi than ban iakren ia kane namar ba tang shi taiew ruh ka politik ka kylla bunsien.
Lah ban kdew ba u bah Paul bad u bah Kyrmen Shylla kiba long myntri ha ka sorkar MDA-2, kila shah pynhap shuki noh dang shen bad ha jaka jongki, la bujli da u bah Metbah Lyngdoh bad u bah Lahkmen Rymbui.
Kumba ka paw, ka la don ka jingad phyllung hapoh ka UDP tangba ki dang set ia mynta shwa ba kan bthei.
U President ka UDP u ong kam don eiei ka jingbujli myntri, saw sngi shwa ban jia, ong u bah Paul
