Shillong: Ki longkmie hapoh ka shatri ka Seng Kynthei Umsning kila pynpaw beit dain hakhmat u myntri rangbah u Conrad K Sangma halor ka jingbym biang ka jingioh um bam um dih khamtam na ka skhim Jal Jeevan Mission kaba la buh jingeh ia ka jingim ba man ka sngi jongki.
Ia kane kila pynpaw hakhmat u Conrad ha ka por ba u leit jngoh ia ka Umsning ha kane ka sngi Thohdieng ka 20 tarik Naiwieng 2025 ha ka jingdon lang u MLA u Dr. Celestine Lyngdoh, u Bah Charles Marngar bad kiwei.
Ha kajuh ka por, ki rangbah ka shnong kila pynpaw ruh ia ka jingbym don ki surok hapoh ka shnong, ka jaka theh niut bad kumjuh ki jaka ieng kali nalor kiwei ki jingdonkam paidbah, ka la buh jingeh shibun namar ba ka Umsning ka dei ka jaka iew. Ka jingialang ka long ha Umsning Town Dorbar Hall.
Ha kane ka jingleit iuhkjat ha Umsning, u Conrad ula pynhap T.1.25 klur kynthup ban shna ia ki nala ha iew Umsning kaba la mang T. 1.5 klur bad T.20 lak na ka Chief Minister’s Special Development Fund ban buh ia ki ding jingshai ha surok ne streets light.
Ula kular ruh ban phah shna ia ka jinglut ia ki enjiniar ban shna noh ia ka madan ialehkai jong ka Umsning Sport and Cultural Club.
Ha kane ka sngi, u Conrad ula pynkup burom ruh ia ki samla kiba la pass bha ha ki eksamin bad ki nongialehkai kiba wanrah takma da kaba noh synniang ruh mar T. 20 hajar na ka Chief Minister’s Special Grant.
‘Ngim ioh um, surok, ym don jaka theh niut’, ong ki longkmie ka Umsning, pynhap u Conrad T. 1.25 klur
