Shillong: Ki pulit ka tnad Anti Narcotic Task Force (ANTF) kila pynkhreh ban pynkhlain shuh ia ka jingiakhun pyrshah ia u drok ha kane ka jylla, ban rat dyngkhong syndon.
U Superintendent of Police (ANTF) u Giri Prassad ula iathuh mynta ka sngi ba haduh mynta ka jingioh kurup ia u drok ka la kot sha kumba 400 klur tyngka bad na kane, tang u heroin la kot sha ka 250 klur tyngka bad kumba 150 ngut ki briew la kem bad pyntian bishar ha ka kashari.
Katkum ka jingong u SP ka ANTF, ki lynti ba ju ioh rung bha u drok, ka dei na Ri-Bhoi bad na East Jaintia Hills bad na Paikan ha Garo Hills. Ha Meghalaya ka jingpyndonkam ia u drok ka la long kumba 50 percent bad 50 percent eiei la shalan pat sha kiwei ki jylla hadien ba la pyniaid lynti na kane ka jylla.
Ha ka jingshisha, ka Meghalaya kam dei ka jaka kaba pynmih drok hynrei la shu pyniaid ia u namar ba ka dei ka jylla kaba iaid lyngba sha kiwei ki jylla bad na kane ka daw, ki briew kila ioh lad ruh ban pyniaid iew ha kane ka jylla.
U SP u la ong ba ki ktem ba kham jur bha ka jingkhaïi drok ka dei ha Shillong, ha East Jaintia bad wat ha Nongstoin ruh. U la ong ba la ai jingmut ia ka sorkar ba kan pyndait CCTV ruh ha ki jaka ba ju kham jur bha ka jingkhaïi drok.
Ha kajuh ka por, ula ong ba u drok ula kham duna mynta hadien ba ki pulit kila treibor bah khamtam ryngkat ka jingiatreilang ki bor shnong,ki samla, ki longkmie kiba pyntip wut wut sha ki pulit haba ki lap ne shem ia ki briew kiba khaï drok. Ula ai khublei ia ki bor shnong, ki nongshong shnong kiba la ai ka jingiatreilang bad ka tnad pulit ban rat dyngkhong ia u drok bad ki jingsniew.
Ha kawei ka liang, u SP ka ANTF ula iathuh ba ki 6 tylli ki sew beh ne K9 kila wan phai sha Shillong na Bengaluru hadien ba kila dep shah hikai. Ula ong ba ia kine ki K9 yn pyndonkam ban sma ia u drok bad kiwei ki kam kiba iadei bad kane.
Ula iathuh ruh ba la pan ruh ia ki jingtba ne scanner khnang ban pynsuk ban lap ia u drok haba don ha kali, ha ki pla. Kila pan ruh na ka sorkar ba kan pynbiang ia ki kot kudi nar ne drone khnang ban kham pynsuk ia ki pulit ban leh iaka kam ha kaba iadei bad kane.
Kumba 400 klur u drok la ioh kurup, 6 tylli ki ‘sew beh kila wan phai na Bengaluru, pan ki pulit sa ka jingtba
