Shillong: Ha ka sienjam kaba kongsan ban pynkhlaiñ ïa ka kam ai jingsumar ia ki paidbah ha ka jylla Meghalaya, ka Indian Oil Corporation Limited (IOCL), hapoh ka sienjam Corporate Social Responsibility (CSR) jong ka, ka la aiti ïa kawei ka Mobile Medical Van bad kawei ka Ultrasound Machine kaba katkum ka juk mynta sha ka Ramakrishna Mission Charitable Dispensary, Latikumkhrah, Shillong.
Ia ka jingialang aiti la pynlong mynta ka sngi ha ka jingïadon lang u R. Nambiar, Executive Director & State Head, IOAODSO, ka Malati Malakar, Senior Manager, Indian Oil Corporation, Swami Hitakamananda, Secretary, Ramakrishna Mission, Shillong, Swami Divyalokananda, Asst Secretary, Ramakrishna mission Shillong, Kong Silbi Passah, nongjop khusnam Padma Shri bad iba pawnam ha ka thoh ka tar.
Ha ka jingai jingkren jong u, u R. Nambiar u la kren shaphang ki jingjop jong ka Indian Oil Corporation, kynthup ïa ka bynta ba kongsan jong ka ha kaba pynthikna ïa ka jingsam ïa ki mar umphniang—kum ka gas shet jingshet—ha kylleng ki pud jong ka ri. U la ong ba ka jingtreikam kaba khlain jong ka seng ka iarap ia ka ban kyrshan ia ki sienjam kiba wanrah ia ki jingmyntoi sha ki shnong ki thaw. U la bynrap ruh ba ka Mobile Medical Van bad ka Ultrasound Machine kan pynkhlaiñ ïa ka jingpoi jong ka Mission sha ki jaka ba jngai bad ba duna ki lad jingshakri bad ban kyntiew ïa ka jingshakri ban wad ïa ki jingpang ha kane ka jaka sumar.
Ka Malati Malakar, ha ka jingai jingkren jong ka, ka la pynkynmaw ba watla ia ka kyntien “Corporate Social Responsibility” la sdang ban pyndonkam bha ha u snem 2014, hynrei ïa ka jingmut ba kongsan jong ka jingkitkhlieh ha ka imlang sahlang la pynpaw kham mynshuwa da u Swami Vivekananda ha ka spah snem kaba 19. Ka la ong ba ka Ramakrishna Mission, lyngba ki kam shakri bapher bapher jong ka, ka la ktah ïa ki hajar ngut ki jingim bad ka dang ïai bteng ban pyni ïa ka mynsiem ai jingshakri.
Haba pynpaw ïa ka jingsngewnguh, u Swami Hitakamananda u la ong ba ki jaka treikam ba thymmai kin iarap ïa ka Mission ban ai jingshakri ia kham bun ki briew da ka jingseisoh ha ki kam bad ka jingsngewlem.
La pynkut ia kane ka prokram da ka jingkren ai Khublei na u Swami Vedeshananda, Director of Academics jong ka Ramakrishna Mission Vivekananda Cultural Centre. U la ai khublei ïa baroh ki kynrem ki lyndan bad ki nongshah khot sngewbha, da kaba ai khublei kyrpang ïa ki monk bad ki dkhot jong ka Ramakrishna Mission Charitable Dispensary kiba dang ïai bteng ban ai ka jingsumar ia ki briew kiba wad ia ka jingsumar bad jingtngen mynsiem.
Ka Ramakrishna Mission Charitable Dispensary, ryngkat bad ka pateng jong ka kaba la slem jong ka jingai jingshakri kaba ioh bynta lang bad kaba sngewlem, ka dang ïai bteng ban long ka jingkyrmen ïa ki briew jong ka Jylla Meghalaya. Ka jingkyrshan na ka Indian Oil Corporation ka pyni ia kawei pat ka sienjam kaba don jingmut sha ka bha ka miat jong ka imlang sahlang bad ka roi ka par kaba pura.
Synniang ka Indian Oil Corporation da ka Mobile Medical Van bad ka Ultrasound Machine sha ka RKM Dispensary, Shillong
