PIB Shillong: Ka Tnad Food, Civil Supplies, and Consumer Affairs (FCS&CA), Sorkar Meghalaya, ryngkat ka jingïatreilang bad ka United Nations World Food Programme (WFP), ka la pynlong ïa ka State-Level Workshop ban pynbiang ia ka Jingpynkhreh kam ba 5 snem na ka bynta ka Targeted Public Distribution System (TPDS) ha Meghalaya.
Ïa kane ka workshop la pynïaid da u Bah Methodius Dkhar, Myntri ba dei khmih ia ka Tnad FCS&CA, ha ka jingïadon lang ka Elisabeth Faure, Representative bad Country Director, World Food Programme India.
Ka TPDS ka dei ka atiar kaba kongsan ha ki jingpyrshang jong ka Meghalaya ban pynurlong ïa ka thong Sustainable Development Goal (SDG) 2: Zero Hunger. Kane ka jingthmu ka ialeh ban pynkhlain ia ki prokram pynbiang mar bam jong ka jylla, kiba pynpoi ia ki hok sha palat 21 lak ngut ki briew—kumba 80 percent na ka jingbun briew.
“Ka jingpynthikna ia ka jingpynbiang mar bam na ka bynta uwei pa uwei u nongshong shnong jong ka Meghalaya, khamtam kito kiba don ha ki jaka ba jngai tam bad kiba kham don ha ka jingma, ka dang long ka jingthmu ba kongsan tam jong ngi. Kane ka workshop ka long kum ka sienjam kaba kongsan ha kaba iatreilang bad ki paralok kum ka WFP ban wanrah ia ka jingthmu kaba peit jngai, kaba kynthup lang ia baroh na ka bynta ka TPDS. Da kaba shim ïa ki jingpynkylla digital bad ki buit ba pynshong nongrim ha ki sakhi, ngi kut jingmut ban tei ïa ka rukom sam marbam kaba biang bad kaba don jingkitkhlieh ka bym iehnoh ïano ïano,” ong u Bah Methodius Dkhar, Myntri ka Tnad FCS&CA.
“Ka jingthmu jong ka Sorkar Meghalaya na ka bynta ka rukom sam marbam kaba katkum ka juk mynta bad kaba ryntih ka buh ïa ka nongrim na ka bynta kane ka thaiñ. Ka WFP ka la sngew sarong ban kyrshan ïa kane ka jingïaid lynti kaba wanrah jingkylla. Lyngba ka rukom ïashim bynta bad ba pynïaid da ki jingtip, ngi kyrmen ban kyrshan ïa ka Meghalaya ban pyni kumno ki lad pynbiang marbam bad ki lad jingïada ki lah ban treikam kham bha na ka bynta man la ki longïing, ban pynthikna ïa ka bam bad ka jingbam ba tei met na ka bynta baroh,” ong ka Elisabeth Faure, Representative bad Country Director, WFP India.
Ka jingialang ka la wanrah shakhmat ia ka jingthmu, ki jingthmu ba kongsan, bad ki lynti pynkylla na ka bynta ka TPDS, da kaba pyniadei ia ki bad ki phang pdeng jong ka ri bad ki thong SDG. Ka kyntiew ia ka jingiasolang jong ki jaka treikam da kaba pyniasoh ia ka TPDS bad ki kam kum ka bam kaba tei, ka rep ka riang, ki lad kamai jakpoh, bad ka jingkyntiew ia ki jaka nongkyndong. La wanrah ia ka jingpynkhreh kam kaba bniah, kaba la batai shai ia ki por, ki bynta, ki jingkitkhlieh, bad ki lad jingpeit bniah ban pynthikna ia ka jingpyntreikam kaba paka. Nalor kata, la iakren ia ki jinghikai na ki jingshem ha ka kam, la bishar bniah ia ki jingduna ha ka jingtreikam, bad la pynmih ia ki jingmut kiba lah ban pyntreikam ban kyntiew ia ka jingkylla ha ka rukom treikam.
La khmih lynti ia ka jingthmu ba iatreilang bad ka sienjam ba lah ban pyntreikam ban wanrah ia ka lynti ba thymmai, ban pynsted ia ki jingpynkylla na ka bynta ka jingktah kaba kham khraw bad ka jinglong ryntih na ka bynta palat lai million ngut ki nongshong shnong, ban long kum ka nuksa kaba lah ban pynbud na ka bynta kiwei pat ki jylla jong ka thain shatei lammihngi kiba iakynduh ia kijuh ki jingeh, bad ban kyntiew ia ka jingai jingshakri.
Pynkhreh ka sorkar Meghalaya bad ka World Food Programme ia ka jingthmu ba 5 snem ban shngain ka jingioh marbam
