Shillong: Dang shen ha kane ka taiew, u myntri rangbah uba dei u President ka NPP u Conrad K Sangma ula kren dait ia ki MLA ka liangpyrshah da kaba buh jingkylli, hato ki pyntreikam hok ne em ia ka MLA jongki.
Khlem pynslem dum dam, mynta ka sngi u bah Ardent Miller Basaiawmoit uba dei u MLA ka Nongkrem bad u President ka Voice of the People Party (VPP), ula leit aiti syndon da ka jingthoh ha Conrad ban sdang noh ban pyllong ia ka jingtohkit halor ka jingpyntreikam ia ka MLA jong ki MLA, bad ula ai jingmut ruh ba kan bha lada ka sorkar kan sdang nyngkong ban tohkit ia ka MLA na Nongkrem konstitwensi kaba u mihkhmat naduh u 2008, khnang ban tip ki paidbah.
Haba pynpaw iaka jingsngew iahap ia ka jingsngew khia u Conrad halor ka rukom pyntreikam ia ka MLA skhim, u bah Ardent haka shithi, u la ong ba u sngew tynnad bha ia ka jingsngew khia jong u myntri rangbah ba dei ban pyntreikam hok ia ka MLA skhim ha ka rukom kaba shai kdar ban iatip paidbah ia ka jingpyndonkam.
U bah Ardent ula pyntip ruh ba ka party ka la dep bthah ia baroh ki MLA jongka ba kin pynthikna ba ka jingpyntreikam ia ka MLA ka dei ban long ha ka rukom kaba khuid bad kaba shai sha u paidbah.
Khnang ban iashai paidbah halor kumno ki MLA ki pyllut bad pyntreikam ia ka MLA, u bah Ardent ula ai jingmut ia u Conrad ban thung noh mardor da ka jingtohkit kaba laitluid ban tohkit ia ki MLA skhim ba ki MLA ki pyntreikam, khnang ba ki paidbah kin ioh ia ka jingshai bad ka jingtip bad ia ka jingtohkit lah ruh ban sdang nyngkong na Nongkrem konstitwensi.
Mar iakren dait u Conrad ia ka MLA skhim, sdang tohkit noh na Nongkrem, dawa tohkit u bah Ardent
