Umiam: Ka Inter-Collegiate Youth Festival-cum-Games & Sports Meet 2025 kaba 9 jong ka Central Agricultural University (CAU), Imphal ka la sdang hynnin ka sngi da ka jingshitrhem kaba khraw ha ka College of Post-Graduate Studies in Agricultural Sciences (CPGS-AS), Umiam. Ia kane ka Youth Fest cum Sports and Games Meet kaba lai sngi kaba la pynlong hapoh ka jingialam jong u Dr. Anupam Mishra, Vice Chancellor, CAU, Imphal bad yn pynlong naduh ka 15 haduh 17 tarik Naiwieng, 2025 ha CPGAS, Umiam.
Ka bynta ba nyngkong jong kane ka prokram ka la sakhi ïa ka jingïashim bynta jong ki samla pule, ki nonghikai bad ki heh ophisar na kylleng ki 13 tylli ki jaka pule jong ka CAU, kaba long ka dak jong ka jingsdang ïa ka jingrakhe ïa ki sap jong ki samla, ka mynsiem ïalehkai bad ka jingïatylli ha ka kolshor.
U Kongsan ha kane ka sngi u Dr. Arun Kumar Sarma, Director General, NECTAR, DST, Sorkar India, u la pynpaw ia ka jingdonkam jong ki jaka pule ba shabar jong ka skul ha kaba tei ia ki riew shemphang ha ka rep ka riang.
Ha kane ka jingplie paidbah, la ioh ia ka jingkren u president da u Dr. Anupam Mishra, Vice Chancellor, CAU, Imphal. U la ban jur ba ki tamasa jong ki samla ki don ka bynta kaba kongsan ha kaba kyntiew ïa ka jingshaniah, ka jingïatreilang, ka jinglong nongïalam bad ka jingsngewnguh ïa ka kolshor hapdeng ki samla pule. U la pynshlur ia ki nongiashim bynta ban ialehkai da ka jinglong ba shisha bad ban tei ia ki jingiadei hapdeng ki jaka pule.
Shuh shuh, ka Prof. Indira Sarangthem, Director of Instruction, CAU Imphal, Padmashree Trinity Saio, Meghalaya, Dr. Puranjan Das, Former DDG, Agri. Extension, ICAR, New Delhi, Dr. Ashok Kumar Singh, VC, RLBAU, Jhansi ki la iadon lang ha kane ka prokram kum ki symbud kongsan.
Ka Inter-Collegiate Youth Festival-cum-Games & Sports Meet kaba 9 mynta u snem kan don ïa ki jingïalehkai kiba bun jait, kynthup ïa ki athletics, ki jingialehkai hapoh bad shabar iing, ki jingiakhun thoh jingthoh, ki jingiakhun pynwandur, bad ki jingiakhun kiba iadei bad ka kolshor. Nalor kane, kane ka tamasa na ka bynta ki samla kan sakhi ruh ïa ka jingkren ai mynsiem, ka jingkren halor ka jingkoit jingkhiah ha ka bor pyrkhat pyrdaiñ, ka Thinkathon, ka Business meet, ka Happiness fair bad ka jingïakren halor ka jingpynïasnoh lang ïa ki AI bad ki LLM ha ka pule puthi bad ka jingwad bniah. Kane ka prokram ka thmu ban pynshlur ia ka jingiakhun kaba kyntiew ia ka jingiatylli hapdeng ki kolej ba don hapoh ka CAU.
La plie paidbah ia ka CAU-IX Youth Festival-cum-Games & Sports Meet 2025 ha CPGS-AS, Umiam
