Shillong: Ka seng Hynniewtrep Youths’ Council (HYC) ka la dawa ba ka sorkar ka dei ban sangeh noh ia ka jingkyndeh ban pyllong tamasa hapdeng sor namar ba ka la wanrah ka jingpynthut ia ka trei ka ktah, ka leit ka wan jong ki paidbah.
Ha ka jingpyllait khubor mynta ka sngi, u President ka HYC u bah Roykupar Synrem ula ong ba ka jingpyllong tamasa Cherry Blossom dang shen ha JN Stadium, Shillong kala wanrah ka jingwit kaba shyrkhei ia ki paidbah ym tang ha ka jingkhapngiah ha ka leit ka wan, ka duh thiah duh dem, ka jinglong jai jai hynrei ka jingsawa kiba la jubor haduh ka la ktah ia kiba don ha ki ïing ki sem kiba don hajan katei ka jaka.
Ka HYC ka la kam ba ha kine ki khyndiat sngi ba la leit, ki nongshong shnong kila ud la thnum na ka jingsngew wit ia ki jingsawa kiba kynjling, ki kam miet, ka jingsahkut kali, bad jinglymbrum lymbram na ki paidbah kiba tuid sha kane ka tamasa.
Watla ka sorkar ka la kam ba ka la wanrah ia ka ioh ka kot jong ka jylla hynrei ka seng ka la ong ba kam pat ban pynwit pynthut ia ki hok jong kiwei. Ka jingsngewbha kiwei kam dei ban pynsngewsih pat ia kiwei.
Halor kane, ka seng ka la dawa ba nangne shakhmat, ka sorkar ka dei ban sangeh ban pyllong ia ki tamasa kiba heh ha jaka sah briew khamtam hapoh ka nongbah Shillong hynrei ka dei ban leit pyllong sha ki jaka ba kham pajih na ki jaka sah briew.
Kein noh shwa ban pyllong tamasa hapdeng sor, wat kamai spah ban pynthut ia kiwei: HYC
