Shillong: U MLA ka Nongkrem uba dei ruh u President ka VPP u bah Ardent M Basaiawmoit ula kam ba ka kam nongialam ha kane ka sorkar MDA kam dei kaba long rangbah, kaba pyrkhat ia ka jylla hynrei ka dei ka jinglong nongialam kaba pyrkhat politik tang na ka bynta ka elekshon, ban ioh synshar biang ia ka jylla da kaba pynbiej pynthame ia u paidbah.
Haba kren mynta ka sngi, u bah Ardent ula ong ba kaei kaei kaba ki leh, kam dei na ka bynta ka jingbit jingbiang jong ka jylla baroh kawei hynrei tang ban ioh ban synshar biang ban pynbiej ia u paidbah.
Ula kynnoh ruh ba ka jingleh ka sorkar MDA ka dei ka jingniew bein, ka jingkhein poh ia ki paidbah nongjied kiba jied ia kiwei pat ki party khlem da jied ia ki party ba don ha kane ka sorkar kaba ialam ka NPP. Phi lah ban pynbiej shipor ia ki paidbah hynrei phim lah ban pynbiej sah ia u paidbah.
Ha kajuh ka por, u MLA ka Mawlai bah Brighstarwell Marbaniang ula ong ba ula phah ia ka proposal lyngba ka CMSDF naduh 2023-24, 2024-25 bad 2025-26 hynrei haduh mynta tang kawei ruh khlem pyllait satia shi naia ruh.
Ula ong ba u ju leit mih man ka por sha ophis u CM ban wad jingtip halor kane.
U Bah Brightster ula ong ba ka jingwan jong u ban wad jingtip biang mynta ka sngi na ophis u Myntri rangbah ban pynkynmaw ka long hadien ba ula kdew kti ia ki MLA ka liangpyrshah ia ka jingpyndonkam ia ki skhim MLA hynrei ka jingkren jong u myntri rangbah bad ka kam kim iahap tara satia.
Na ka CMSDF uwei uwei u MLA u ioh bhah kumba 10 lak eiei shi snem pynban tang ia kane ruh kaba rit um pat pyllait.
Ha ka MDA wan ka elekshon hakhmat, ka jylla shadien, ong u bah Ardent
