PIB Shillong: Ka Raj Bhavan, Shillong, mynta ka sngi ka la rakhe ia ka jingdap san snem jong ka Nasha Mukt Bharat Abhiyan, da kaba pynlong ia ka jingialang kaba kyrpang ryngkat ka jingiatreilang bad ka Tnad Social Welfare jong ka Sorkar Meghalaya.
Haba ai jingkren ha kane ka sngi, u Lat ka jylla Meghalaya, u C H Vijayashankar u la kyntu jur ia ka sienjam ban wanrah ia ka imlang sahlang kaba lait na u drok. U la ban jur ïa ka jingdonkam jong ka jingiai bteng ban pynsngewthuh paidbah kaba la pyntreikam tyngeh ha ki skul, ki kolej bad ha ki shnong ki thaw ban ïada ïa ki samla jong ka Jylla. U Lat ka jylla u Vijayashankar u la ban jur ruh ïa san tylli ki jingeh ba kongsan ha ka imlang sahlang kiba donkam ïa ka jingïarap kaba mardor bad kaba ïatreilang na ka Tnad Social Welfare na ka bynta ka jingbuh jingtip bad ka jingpynsngewthuh paidbah, da kaba ong, “Ki don san tylli ki jingeh ba kongsan – U Drok, HIV lane AIDS, TB, Cancer bad ka jingpun khun ki khynnah samla.” U la kyntu ia ka Jylla ba kan wan lang kum ka imlang sahlang bad ban iatrei lang ban pynurlong ia ka Nasha Mukt Bharat.
U Lat u la ban jur ia ka jingdonkam kaba kongsan jong ka jingpynsngewthuh paidbah kaba neh bad ka jingiashim bynta kaba jylliew jong ki paidbah ban tehlakam bha ia ka jingdih pynbuaid. U la shim ia ka kabu ban ai jingiaroh ia ka bynta kaba la leh da ki nongshim bynta bapher bapher, kynthup ia ki tnad sorkar, ki jaka pule, ki seng treimon sngewbha, bad ki samla kiba trei mon sngewbha, ha kaba pynthikna ba ka campaign ka poi sha ki jaka nongkyndong.
U Lat u la pynskhem shuh shuh ia ka jingaiti sha ka mishon da kaba ialam ia ka jingbam smai ban pyrshah ia u drok ia baroh ki nongiashim bynta. Ka jingbam smai ka ban jur ia ka bynta jong ki samla kum ka bor jong ka ri bad la ban jur ba ka jingkylla ka dei ban sdang nalade.
Hadien kane, ki ophisar na ka Tnad Social Welfare ki la ai ia ka jingbatai bniah ia ka jingkiew kaba kongsan kaba la ioh hapoh kane ka campaign ha kine ki san snem ba la leit noh. Ki jingjop ba la kdew ki kynthup ia ka jingpyniar ia ki jingshakri ai jingiasyllok, ki prokram ai jingtip kiba thmu ia ki shnong kiba kham don ha ka jingma, bad ka jingpynkhlain ia ki sienjam ai jingsumar.
Kaba kham kongsan ka long ba kane ka campaign ka la lah ban pynsngewthuh bad ai jinghikai ïa palat 14 lak ngut ki briew ha Meghalaya bad ka la kynthup palat 1,923 tylli ki jaka pule lyngba ki kam ai jingtip bapher bapher.
Ia kane ka prokram kaba la wan ban iashim bynta ruh da u Bah Paul Lyngdoh, u nongai jingmut jong ka Tnad Social Welfare jong ka sorkar Meghalaya ryngkat bad kiwei pat ki heh ophisar ka tnad, ki nongmihkhmat jong ki seng bhalang, ki nongialam ha ka liang ka pule puthi, bad ki seng samla, la pynkut noh da ka jingkyntu ban don ka jingiatreilang. Ka thong ka dang sah ban pyniaid shakhmat ia ka thong jong ka Nasha Mukt Bharat Abhiyan da ka jingtreikam kaba kham khlaiñ, ban pynthikna ia ka lawei kaba shngain, kaba koit ba khiah bad kaba lait na ka jingdih pynbuaid na ka bynta ka Jylla bad ka ri.
Ban jur u Lat ia san tylli ki jingsniew ba kongsan ha ka imlang sahlang
