Kham I biang ka Cherry Blossom ha Bhorymbong ban ia ha JN Stadium Polo

Shillong: Ka tamasa Cherry Blossom kaba pyniaid bad pyllut ka sorkar jylla ka la iaid sha katto katne snem ha ka jylla hynrei dang shen, ka sorkar ka la pynheh ia kane ka tamasa ban poi shaduh kyrdan bad kiwei kiwei ki tamasa ba heh ha ka pyrthei.
Ar snem ka la pyllong ha madan Kurkalang ha Bhoirymbong, bad ka tamasa ka la khring ia ki paidbah satlak. Ka jingkylluid ki jaka ka la pynsngew tynnad ia ki paidbah naduh ka jaka ieng kali, ka leit ka wan, ki dukan, bad kiwei ki jingialehkai ha kaba ki briew ki suk ban iaid ban ieng ban mih ban leit shano shano kaba ki kwah.
Ka pynthut ruh ia ki khynnah, ki samla pule kiba dang durut ban iakhun ia ki eksamin kum ha kane ka samoi.
Katba ha JN Stadium, Polo Shillong ka long kumba set op, namar ba ki briew shisien ba la rung sha madan kim ioh lad shuh ban mih, bad kim ioh lad shuh ban iaid shane shatai, bad ka long beit thik tang ban sngap ia ki jingrwai. Ka jingkhapngiah ka jaka, naduh ka jaka ieng kali, bad ka jingbym ioh lynti ban iaid shane shatai, ka la pynngiah ia ki briew watla kim banse ba kwah eh ban sngap bad shad ban iohi ia ki nongrwai.
Ka la wanrah ruh ia ka jingsahkut kali bad wat ia kito kiba lei tba wan shane shatai, ka la pynthut shibun eh.
Don kiba pynpaw ba ka tamasa kaba heh kum kane, kam dei ban long ha nongbah hynrei dei ban peit sha ki jaka kaba kham biang kiba kham pajih na sor.
Ha kane ka tamasa, kaba ar sngi la plie u Myntri Rangbah u Conrad K. Sangma bad la pynshong shit da ki nongrwai nongshad ba pawnam ha baroh ar sngi. Ha ka sngi ba nyngkong la sakhi ia ki nongrwai bad ka nongshad ka Nora Fatehi, nalor ka kynhun rwai The Script na Ireland, nangta u Jason Derulo na America.
Katba ha ka sngi kaba kut, la pynshong shit da ka kynhun na Denmark ka Aqua, nangta u Tyga bad kiwei.
La don ruh ki nongrwai na kane ka jylla kum ka Meba Ofilia bad na ka thain nalor kiwei ki jingialehkai jingpynbyrngia ia ki paidbah.
Ka tamasa ka la khring bun ia ki paidbah na kylleng ka ri bad kumjuh nabar ri ban wan mad ban iohi ia ka ha ka nongbah Shillong.
Ha kane ka tamasa, ym tang ki jingrwai ki jingtem, ki jingshad hynrei la don ruh ka jingdie ia ki tiar ki tar, ki mar ki mata, kiba na kane ka jylla bad nabar ruh. Ki dukan bam, dukan dih, ki jingialehkai kum ka shong masi prut, jingiakhun kti, Ferris wheel, shon dur bad bun jait kiwei kiwei ban pynbyrngia ia ki paidbah, nangta ka don ruh ka jingiakop thei bha briew bad rang kynsai.
Ka riam ka beit ki samla samhoi ruh ka la thaba khriek da ki stai bapher bapher ha ka mon bad ka jingsngew tynnad jongki.
Ka madan Polo bad ki sawdong jongka, kila sawa da ki sur ba kynjling kynjrim khlem sangeh haduh shiteng miet.