Shillong: Ka Govt UP School, Mawphlang, kaba la ai ka jingshakri la 98 snem ia ka ri Khasi-Jaintia, pynban ka la ring sdot ha kine ki snem haduh ba don ka snem ba don sa tang iwei I khynnah ba wan pule haduh ba ka la pyllong ia u Headmaster ban ialam ia ka khun ban wan pule ha kane ka skul, ym ban phah sha ki skul ba pawnam ha sor Shillong.
U headmaster kane ka skul u babu J Kharryja ula iathuh ba katkum ka rekod, ha kane ka skul ki don kiba wan skul naduh Nongnah, Mairang, Pariong, Mawphlang, Mawreng, na thain Jaintia Hills bad na kylleng ki jaka ka ri Khasi-Jaintia ha ki snem 1928 ter ter bad ka la ai jingshakri kaba khraw bha ha kito ki snem ha kaba ka jingdon ka skul ki duna bha.
Ha kaba iadei bad ki nongseng, ka skul ka dang wad jingtip bha na ki nongpyniaid ka Hima Mawphlang namar ba kane ka skul kan sa dap 100 snem ha u 2028, kaba long sa tang ar snem.
U babu Kharryja ula ong ba naduh ba wan shimti ha 2022, ka skul ka duna bha ki khynnah skul ha kaba ki don tang 5 ngut bad ha u snem 2023 lei, la don sa tang iwei I khynnah skul bad kane ka la wanrah ka jingeh kaba khraw bha ia u kum u Headmaster. Kane ka la pyllong ia u ban iasyllok bad ki nongpyniaid shnong nongpyniaid hima, ki para nonghikai ban iathir ban kyntiew ia kane ka skul namar ba ka la buh ha tmir ia ka skul sa ban shu khang dam noh namar bym don khynnah skul shuh.
Hadien kane, la sdang wan biang ki khynnah ban pule ha kane ka skul kaba pawnam bha ha ki snem mynshwa bad mynta u snem ki don 73 ngut bad kane ka dei ka nuksa kaba bha.
Ki daw kiba ktah ia kane ka skul sorkar ka lah ban dei namar ba ka shu long lyngkrang watla ka dei kaba la rim tam ha ka ri Khasi ha kaba kam don ka jingker kynroh ha kaba rung ki masi ki blang katba mon, bad ka pyllaitlan ia ki briew ban rung katba mon, ka iing ruh ka neh sah, ki kamra kiba rit, bad bun kiwei ki jingdonkam ba ka sorkar ka shu ieh khunswet. Kam don satia wat ia ka sobjek computer ruh, ki painkhana ruh kim biang. Kawei pat ka dei namar ba kam pat don ka Secondary namar ba ka don tang ka Upper Primary haduh mynta.
Ha ka por ba u wan shimti, da ka jingiatreilang bad ki riew rangbah ka shnong bad ki nonghikai, ula shim khia ban leit ai jingkren hakhmat ki kmie ki kpa ban iawer ba kin wan pule ha kane ka skul. Ia ka khun lajong ruh ula ialam ban pule ha kane ka skul bad kumjuh ia ki khunruit, ia ki para khynnah na Mawkriah ban wanrah ia ka nam ka burom jong kane ka skul.
Kumba paw, ka daw kaba la pyllong ia kane ka skul ban ring sdot ha kine ki khyndiat snem ba la dep, ka lah ban dei namar ba ka sorkar ka shu ieh khunswet ia kane ka sorkar jongka.
Ka skul barim tam ha ri Khasi-Jaintia la ieh khunswet ka sorkar, ialam u headmaster ia la khun ban wan pule
