Shillong: Ka Khasi Hills Autonomous District Council (KHADC) ka la pynsangeh noh shwa ia ka jingthmu ban pyllong ia ka jingleh niam ha Iewduh ha ka 18 tarik Naiwieng 2025.
Ha ka hukum kaba la pynmih mynta ka sngi, ka 17 tarik Naiwieng 2025, kaba la soi da u CEM bad EM ka Elaka, ka KHADC ka la kdew ba namar ba ka kam ka long kaba syier bha, bad ka lah ban wanrah pynban ia ka shongsuk shongsain na ka jingiakajia halor kane.
Ka KHADC ka la ioh pdiang iaka jingujor haka 07 tarik Risaw, 2025 na u Lyngdoh Raid Mylliem, Mylliem Syiemship bah Kyrshon Lyngdoh Marbaniang pyrshah ia ka jingthmu jong ki myntri San Kur Khatwei Kur ban pyllong ia ka jingleh niam ha Iewduh, Hima Mylliem kaba la buh ha ka 18 tarik Naiwieng 2025. Hadien kane, ka Executive Committee ka KHADC ha ka 21 tarik Risaw 2025, kala phah ia kane ka jingujor sha u Syiem Mylliem ban pan jubab, uba la phah pat ia ka jubab ha ka 24 tarik Risaw 2025.
Ka Executive Committee ha ka 27 tarik Risaw, 2025, ka la phah ia ka jubab u Syiem sha u Lyngdoh Raid Mylliem, Mylliem Syiemship bah Kyrshon Lyngdoh Marbaniang bad la shim bishar ha ka 31 tarik Risaw 2025 hynrei la pynsangeh noh namar ba la ujor noh ia kane sha ka Kashari High Court, Meghalaya, kaba la pynmih ia ka hukum ha ka 3 tarik Naiwieng 2025 da kaba phah sha ka Executive Committee ka KHADC ban bishar.
Katkum ka jingbthah ka High Court, Meghalaya, ka Executive Committee kala pyllong ia ka jingbishar ha ka 13 tarik Naiwieng 2025 ha kaba baroh ar liang, kila wan ban pyni ia la ki nia. Hadien ba la bishar bniah na baroh ar liang mamla, ka Executive Committee ka la sngewthuh ba ka don ka jingiakajia ban pyniaid ia ka jingleh niam namar ba kam don kano kano ka jingthoh kaba shai ne ki sakhi kiba shai mano ba dei ban pyniaid ia ka jingleh niam. Halor kane, ka EC ka sngew ba lada shah ban leh niam ka lah ban mih pynban ka jingpynthut ia ka suk ka sain, ka leit ka wan ki paidbah bad kan wanrah shuh shuh ka jingjyrwit jyrwat.
Halor kane, ka EC ka la rai bad bthah ban pynsangeh shwa ia ka jingpynkhreh ban leh niam ha Iewduh ha ka 18 tarik Naiwieng 2025 haduh ban pynbna da kumwei pat.
Ioh mih huri hura, pynsangeh shwa ka KHADC ia ka lehniam ha Iewduh
