Shillong: Ka nongrwai kaba dei ruh ka actress ka Nora Fatehi kala Khyrwait shad padai syngkai haduh ba la shongshit puk ki paidbah ha ka tamasa Cherry Blossom ha JN Stadium, Polo mynta ka janmiet.
Ka Cherry Blossom kala thaba liep da ki ding ba shyrkhei ryngkat ka jingtem jingput kaba la pynkhynniuh ia ka Polo.
Nalor ka jingshad pyneh bad pynkhih syngkai ka Fatehi, ka kynhun nongtem The Script na Ireland ruh kala rwai pynjem jai ia ki paidbah ban pynshong shit taiñ ia kiba wan kylleng ki jaka khamtam na ki jylla ha North East.
Nalor ka jingtem jingput, ka tamasa kala sakhi ryngkat ka jingbam jingdih, ki jingshad, bad kiwei kiwei ki jingialehkai kiba pynsngew bang bad pynshongshit ia ki paidbah kynthei bad shynrang.
Ki don ruh ki jaka ia ki heh ki haiñ kiba la wan ban pynjahthait ha kane ka tamasa.
Ka jingrwai u Jason Durelo ka la kham pynkynshek kynshieng ia ki paidbah ban shad khyrwait pynguh pyndem ia la ka met shane shatai.
Khyrwait ka Nora, rwai jem ka Script, kynshlek u Jason ha Cherry Blossom, meh ding ka JN Stadium
