Shillong: Ka Hynniewtrep Border Dispute Redressal Forum (HBDRF) hynne ka sngi ka la ai por biang ia ka sorkar jylla sa 10 sngi ba kan ai jubab halor kiei ki sienjam ba ka la shim na bynta ban weng ia ki jingeh ba la iakynduh da ki paidbah Khasi-Pnar kiba sah ha Block-I ha khappud jong ka jylla Assam.
Mynta ka sngi, 13 tarik Naiwieng 2025, ka HBDRF ka la aiti biang ia ka dorkhas sha u Myntri Rangbah ka jylla u Conrad K. Sangma ban pynkynmaw ia ki jingdawa jong ki, bad la kyntu ia ka sorkar ba kadei ban weng noh ia ki jingeh jong ki paidbah kiba sah ha khappud jong ka jylla Meghlaya- Assam.
U Chairman ka HBDRF u bah Chadame Sungoh, ula ong ba la bunsien ki la phah jingthoh sha ka sorkar ba kadei ban shimkhia ia kane ka jingeh, hynrei haduh mynta ki la shu sngap man man.
U bah Chandame ula ong ba ki paidbah mynta ki la sdang ban ngiah namar la 3-4 snem naduh ba sdang ka jingpynbeit pud khlem da lah ban pyndep, ka long kaba buh jingma bha ia ki nongshong shnong ha khappud namar ka jingshah nion bein kaba jur bha ka wan na kawei ka liang.
Ka seng ka la dawa ruh ba ka sorkar kadei ban ithuh noh hapoh ka jylla Meghalaya ia baroh ki shnong Khasi-Pnar kiba don ha Block1 khamtam kiba hap ha ka Elaka Labang Nongphyllut namar ia kine ki shnong la ai sanat da ka JHADC.
Ha kajuh ka por, ula ong ba haduh mynta ki nongshong shnong ha kitei ki thain, kim pat ioh ia ki kot ki sla ba donkam kum ka Epic, ki Adhaar, ki srnod kha bad kiwei de.
“ Ki don tang katto katne ngut ki don ia ki kot ki sla sha jylla Assam, hynrei kiba bun haduh mynta kim pat don ia ki kot ki sla sha Assam ne ha Meghalaya bad kane ka la buh jingeh ia ki,” ula bynrap.
10 sngi jubab hooid ne em, ngin sngewthuh: byrthen ka HBDRF ia ka sorkar
