Shillong: Ka Congress ka la kam ba la don kumba 10 hajar ngut ki paidbah ha ka jylla kiba la pynpaw ka jingpyrshah ia ka jingtuh, ka jingthok vote. Kine ki 10 hajar ki pynpaw ia ka jingpyrshah da kaba soi paidbah.
U nongialam ka MPCC u bah Manuel Badwar haba kren mynta ka sngi 12 tarik Naiwieng 2025, u la ong ba ka jingiasoi paidbah kan iai bteng pyrshah ia kane ka jingtuh bad thok ia ki vote bad ban sangeh mardor ia kane ka kam runar pyrshah ia ka synshar paidbah.
Ula kynnoh ba kane ka sorkar pdeng, ka dei kaba synshar da ki katto katne ngut ha kaba ka mynsiem ka synshar paidbah ka la jah. Ula kynnoh ruh ba kila shna thok ia ki vote khnang ban pynthikna ba ka BJP kan iai neh ha ka bor. Ka jingialap paidbah u Rahul Gandhi ka long kaba jur ha kaba ki briew kila pyndonkam da ki dur ki briew nabar ri ban pyndonkam kum ki nongthep vote ha ka ri.
U bah Manuel ula ong ba ha Bihar kumba 60 lak ngut ki briew kila shah weng kyrteng kum ki nongthep vote, ha kawei ka Konstitwensi ha Karnataka, shi lak ngut ki briew kila shah weng kyrteng kum ki nongthep vote.
Ula ong ba ka Congress ka la leit sha man ki block ha Meghalaya ban ialap pyrshah ia kane ka jingleh buit thok, khnang ban pynim biang ia ka synshar paidbah na ka jingsynshar donbor ka BJP.
Ka jingtuh bad thok vote: lah 10 hajar kiba soi paidbah ha Meghalaya, kam ka Congress
