Kane ka long ka jingpyntip bad jingpynbna paidbah ïar ba ka Elaka Mawsmai–Nongthymmai kaba kynthup ïa ki shnong Nongthymmai, Mawsmai, Mawblang bad Thangkharang, ka don la ka jong ki riti ki dustur ha ka synshar khadar kaba la buh nongmei nongpa da ki mynbarim naduh ki por mynshuwa. Hadien ka jinglaitluid jong ka ri India, la ithuh pura ïa ka kum ka Sirdarship ba laitluid hapoh ka jingpeit jong ka United Khasi–Jaintia Hills Autonomous District Council (mynta ka Khasi Hills Autonomous District Council – KHADC).
Ha kaba ïadei bad ka riti bat khyndew, ka Elaka ka bud ryntih ïa ka rukom bat khyndew kumba la buh la seng da ki longshuwa jong ka hima; ha kaba baroh ka khyndew bad marpoh khyndew kiba don ha ka Elaka ki dei jong ka Elaka. Kane ka mut ba baroh ki khun ki hajar jong ka hima ki long kynrad lang ïa ka jaka puta lyngba jong ka Elaka. Ïa ka jaka puta la bynshet ha ka jingpeit jingkhmih bad jingpynïaid jong ka Dorbar. Dei tang ki trai shnong jong ka Elaka kiba lah ban ïoh bynta ïa ka jaka ka puta ha ka Elaka. Lada don na ki trai shnong kiba donkam jaka na ka bynta ban thaw ïing thaw sem ne seng kino kino ki kam, ki lah ban pyntip sha u Sirdar bad u Sirdar pat un sa buh ïa kata ka jingkyrpad hakhmat jong ka Executive Dorbar ban bishar bniah.
Ka Executive Dorbar kan bishar bniah ïa ka jingkyrpad ban tip ïa ka jingshonghok bad jingdonkam jong u nongkyrpad. Lada u nongkyrpad u la dep jied ne kdew ïa ka jaka kaba u kwah, yn sa leit jurip da u Matabor (Headman) ryngkat katto katne ki rangbah jong ka shnong kaba don kata ka jaka. Hynrei lada ym pat don jaka kaba la pynpaw, yn bthah ïa u nongkyrpad ban leit peit shuwa ïa ka jaka.
Ha ka jingjurip ïa ka jaka, yn khmih bniah ba:
i) ka jaka kam dei ka tyllong umbam umdih;
ii) kam dei ban khang ïa ka lynti ne surok paidbah; bad
iii) ka dei ban long jaka kaba bit bad ba shngaiñ na bynta ban shong ne na bynta kata ka jingthmu.
Da kane ngi pynbna paidbah ba ka Elaka ka khang pyrshah ïa ka jingleh benami ïa ka jaka puta ha shnong ha thaw. Lada don kino kino kiba pynkheiñ ne ïaid pyrshah ïa kane ka riti jong ka Elaka yn pynshitom ïa ki katkum ka rai jong ka Executive Dorbar. Ngi pyntip ruh ba ym ju shah ïa uno uno ban die ne thied jaka hapoh ka Elaka Mawsmai–Nongthymmai. Lada u/ka trai jaka u/ka kwah ban mih noh na kata ka jaka, u/ka lah ban shim noh ïa ki jingdon jingem jong u/ka ne wengnoh ïa ka ïing, hynrei kata ka jaka ka hap biang ha ka jinglong trai jong ka Elaka. U/ka lah tang ban die ïa ka ïing hynrei ym ïa ka jaka, bad uba thied ruh u dei ban sngewthuh bad pdiang ïa kane ka kyndon.
Ngi pynbna ruh ba ha Elaka Mawsmai-Nongthymmai ngim ju ai ne die jaka sha ki briew kiba nabar hima. Kumta, uno uno ne kino kino ki riewpaidbah ne ki nongdie jaka kiba pynbna ban die jaka hapoh ka Elaka ki leh da ka buitthaw hi bad ka dei ka kam lamler. La kyntu ïa ki paidbah baroh, khamtam ïa kiba na Khasi bad Jaintia Hills, ba kin ym ngeit ne shah thok ha kine ki phlan duman jongno re jongno.
La kumno kumno ka don pat ka jingpyrkhat ba kyrpang na ka bynta ki shlem jingpule ne ki tnat sorkar kiba pan jaka na ka Elaka kiba wanrah jingmyntoi ïa ki khun ki hajar jong ka hima bad jingkyrkhu ïa ka jaitbynriew hi baroh kawei. Jar la katta ruh ïa kiba kum kine ki jingkyrpad yn sorjamin bniah da ka Executive Dorbar bad lehse lah ban twad jingmut ruh na ki nongshong shnong lada donkam. Ka jingai jaka ïa kiba kum kine kan long lyngba ka jingthoh soskular kaba shai ryngkat ki kyndon ki ban tehlakam ba kan ym don ka jingpyndonkam bakla ïa ka jaka. Lada jia ba kiba kum kita ki shlem/tnat ki sangeh noh ban treikam katkum ka jingthmu ba la ai, ka Elaka kan shim noh ïa ka jaka sha lade.
Shri Kenes Khongwar
Sirdar, Mawsmai–Nongthymmai Elaka
East Khasi Hills District, Meghalaya