Shillong: Ha ka 7 tarik u Naiwieng,2025 ka Thainthynroh Sports Social and Cultural Club kaba hap ha Lyngiong Lyngdohship ka la ioh ban plie ia ka lympung ialehkai ka Thainthynroh Premier League ha madan ialehkai ka shnong ba la iashim bynta da ki nongshong shnong.
U Bah Staising Kharbteng uwei na ki ‘riew rangbah ba pawkhmat ka thaiñ u la long kum u Kongsan ban plie pyrda ia kane ka lympung ialehkai ha ka jingdon ryngkat u Lyngdoh ka Hima Lyngiong Lyngdohship u Ma Hamphrey Lyngdoh Ryntathiang bad kiwei kiwei. Haba kren ha kane ka jingplie pyrda u Bah Staising Kharbteng u la pynkynmaw ia ki rangialehkai ia ka mynsiem iatylli bad iatreilang ba don ha madan ialehkai ka dei ban rung ha ka imlang sahlang na bynta ka jingmyntoi kiba bun. U la kyntu ruh ban kiar na ki jingthaw kynhun ne iapait iapra. U Lyngdoh ka Hima Lyngiong u la kitbok kitrwiang ia ki khun samla ba iashim bynta ban ialehkai da ka mynsiem shipara ban pyni ia ka sap ba ki don. La pyniaid ia ka jingialang ba lyngkot da i bah Banraplang Kharbteng iba long u Rangbah Shnong bad nongialam ka Club.
Ha ka sngi sdang ka jingialehkai ka Blue Diamond FC ka la pylliem ia ka Rising Star FC da ar la kawei bad ka Ongiui FC ka la iakhaid mar kawei pyrshah ia ka Lumdiwah FC.
Plie u bah Stai ia ka Thainthynroh Premiere League
