Shillong: U Lat ka jylla ka Meghalaya u C.H. Vijayashankar, ula sakhi lang ha ka jingpyllong ka Seng Khasi-Sein Raij ia ka jingthung mawbynna ha u lum sohpetbneng shi bynta jong ka jingrakhe ia ka jingdap 125 snem ka Seng Khasi Kmie.
Ha kane ka prokram la don lang u symbud myntri rangbah bah Prestone Tynsong, u myntri ka tnad Lariti bah Sanbor Shullai, u myntri ka tnad pule puthi bah Lahkmen Rymbui bad ki nongialam ka Seng Khasi-Sein Raij bad ki paidbah kiba don ha ka niam tynrai.
U Lum Sohpetbneng u dei u lum kyntang kiba don ha ka niam Khasi kaba ki ngeit ba ka don ka jingkieng ksiar hyndai kaba iakiew iahiar hapdeng ka khyndew bad ka bneng.
Ha kane ka sngi, la thung 41 tylli ki maw bynna ha u kliar jong u Lum Sohpetbneng na ki tnad seng Khasi, Sein Raij bapher bapher ka ri Khasi-Jaintia.
Haba kren ha kane ka sngi, u Lat ka jylla ula pyrto ia ka Seng Khasi kaba la khih kaba ksar ban pynneh pynsah ia ka jinglong tynrai ha kine ki palat spah snem haduh mynta.
U Lat ula ong ba ka jingpynneh pynsah ia ka mariang ka dei ka rukom kaba la rung jylliew ha ki thied snam ka jaitbynriew Khasi kum ka lariti kum ka jingainguh ia u nongthaw. Ula kyntu ban don ka jingiatreilang ryngkat ka jingkitkhlieh ban iada ia ka spah mariang kiba don ha ka jylla Meghalaya na ka bynta ki pateng ban sa wan.
Ka la don ka jingduwai phirat na ki riew tymmen riew san ka Seng Khasi ha kane ka jingthung ia ki maw bynna ha kliar une u lum ba kyntang.
Sakhi u Lat ia ka jingthung 41 tylli ki mawbynna ha Lum Sohpetbneng
