Shillong: Ka iew ha Nongspung ka la rim bha kaba dang ieng haduh mynta mynne wat hapdeng ka jingkylla ka por.
Ka iew ka don ha shnong Nongspung jong ka Hima Nongspung bad ka jngai kumba 50 km eiei na sor Shillong ha ka surok na Sohiong.
Kane ka iew ka dei ka iew kaba ju thnem bha ha ki por mynshwa namar ba ki briew na kylleng ki jaka jong katei ka thain ki ju wan ban thied ban die ia ki mar ki mata jongki.
Hynrei kaba pyndiaw mynsiem ia ki briew ka long ba mynta kane ka iew, ka la ring sdot. Katkum ka jingiakren bad ki nongshong iew bad ki nongialam ka shnong Nongspung, la sngewthuh ba ki don bun ki daw kiba la pyllong ia kane ka iew ban nang ring sdot. Ka daw kaba kongsan ka dei namar ba ki briew na ka thain Laitnongrim, Lyngkhoi, bad kiwei ki shnong katei ka jaka, kim ju kham wan iew shuh naduh ba kila ioh ia ka surok namar ba kam don ka surok kaba iaid na Nongspung sha Laitnongrim, kaba la pynngiah ia ki ban wan da ka kjat.
U Acting Sordar ka Shnong Nongspung u bah John worthborn Kharmyndai ula iathuh ba kim don jingtip naduh mynno la seng ia kane ka iew, hynrei ka dei kaba la slem bah.
La ong ba ka iew Nongspung mynshwa ka dei kaba heh bha kum ha Khyndai Lad ha kaba iatyngkhuh para briew ruh bad ki briew ki wan iew da ki kulai hynrei mynta ka la hiar. Ka shnong ka ai wai ia kane ka iew ban khrong bai musur bad ia ka jingmih la pyndonkam ha ki kam ka shnong.
Kala don ka jingpynsngew sha ka sorkar ia ka jingdonkam ban pynbha ia kane ka iew bad kumjuh ia ki surok ha katei ka thain khnang ba kan long ka jingmyntoi bad kyntiew ia ka ioh ka kot ki paidbah.
Ia ki nongshong iew, la shah tang ia ki para Khasi bad ia ki khyllah jait, ka shnong kam pat pdiang ban wan shong iew.
Katba u bah bad u bah Mosterling Lyngdoh u executive member, ula iathuh ba la ioh skhim mynshwa na ka Agriculture ban shna ia ka iew ha u snem 2011 ne 2012. U la ong ba kane ka jaka ka dei kaba long pdeng bha hynrei ka sorkar ka leh klet ia ka thain kaba la pyllong ban sahdien khamtam ha ka lynti syngkieng.
Ha jingshisha ki kwah ban pynkiew ia ka iew bad ia ki jaka kiba itynnad ban khring ia ki nongwankai hynrei ka surok kaba bha ka dei kaba kongsan tam.
Ki riew tymmen katei ka shnong kynthup u bah Rospinton Syiemlieh bad bah Doling Kharsyntiew kiba la iathuh ia ka khana jong ka iew mynshwa bad mynta, tangba kim ioh jingtip naduh mynno la pyllong iew hynrei kila iathuh ba ka dei kaba la rim namar ba naduh ba ki dang khynnah ruh ka la heh bha ka iew.
Hynrei kawei kaba ki iohi ia ka jingkylla jong kane ka iew, ka long ba ka nang rit pynban katba nang iaid ki sngi.
Mynshwa iatyngkhuh para briew kum ha PB, mynta ring sdot ka iew Nongspung
