Shillong: U President ka VPP u bah Ardent M Basaiawmoit ha ka sngi Nyngkong ka 3 tarik Naiwieng 2025, ula aiti ia ka dorkhas sha u Myntri Rangbah ka Jylla Conrad K Sangma, ba pynpaw ba ka VPP ka pyrshah ia ka Office Memorandum jong ka Sorkar ba pynmih ha ka 25/09/2025 ba ong ba dei ban weng kam noh ia ki Nongtrei Adhoc ba thungkam hadien u snem 2007 bad ba ki hap ban iakhun ia ka eksam thungkam.
Ula ong ba ki Nongtrei adhoc ba thungkam hadien ka 31 tarik Nohprah 2007 kila ai ka jingshakri ba palat shiphew snem khlem ka jingsangeh kam bad ka jingshakri jongki, kala pynlah ia ka Sorkar ban pyniaid ia ki kam ki jam.
U la sngew pyrshah ba kine ki nongtrei kin shah wengkam bad ba kin hap iakhun iaki eksamin thung kam namar ba kam dei ka jingleh bakla jong ki ba kila shah thungkam bad iai bteng ban ai ka jingshakri.
Katkum ka dorkhas u bah Ardent u la ong ba ka VPP ka pyrshah jur ia ka hukum jong ka Sorkar ban weng kam ia kine ki nongtrei ba la thungkam khlem ki sanction post. Ka long kaba bakla na ka liang ka Sorkar ban kyndit bynriew ha u snem 2025 haba ka jingthungkam kala jia 15 snem mynshuwa. Kine ki Nongtrei ki don ia ka hok ban kam ia ka jingthungkam pura kumba long ia kiwei pat kiba hashuwa jong ki.
Ula dawa ba ia ka jingshakri jong kine ki nongtrei dei ban pynskhem pura noh bad ka Sorkar ka dei ban sangeh syndon ban pyndik ia ki.
Ha kajuh ka por, ula kyntu ia ka Sorkar ban pynkut noh syndon ia ka jingthungkam adhoc kaba long pyrshah ia ki rule ka Sorkar hadien habud bad ban tynrong ia ka jingkitkhlieh ha ki Ophisar ba leh tam.
Thung pura ia kiba dep thung mynshwa, pynkut noh ka thungkam adhoc: Ardent
