Shillong: Ka Voice of the People Party (VPP) ka la dawa na ka sorkar jylla ba kan sei madan noh ia ka report ka Expert Committee On Job Reservation Policy khnang ban iatip paidbah.
Ha ka jingthoh kaba la phah ha ka 3 tarik Naiwieng 2025, sha u Myntri Rangbah ka jylla u Conrad K Sangma, u President ka VPP u bah Ardent M Basaiawmoit u la ai khublei ia ka Expert Committee kaba la lah ban pyndep ia ka kam hadien ar snem kynthih ban aiti ia ka kaiphod sha ka sorkar.
Hynrei naduh ba ka Expert Committee ka la aiti ia ka kaiphod, ka la iaid mynta sha ka san bnai kynthih hynrei ka sorkar kam pat pynbna ne sei madan satia ban tip ki paidbah. U bah Ardent ula ong ba ka la iaid san bnai ka long kaba slem palat ka jingleh ka sorkar bad ula dawa ba ka sorkar ka dei ban sei madan noh ia ka kaiphoh jongka, khnang ban iashai baroh.
Lah ban kdew ba ka Sorkar jylla ka la ioh pdiang ia ka kaiphod na ka Expert Committee halor ka bhah thungkam bad ka la dep rah ruh ha ka cabinet hynrei ka dang aiti ha u Chief Secretary ban pule bniah ia ka hynrei haduh mynta kam pat sei madan satia ia kane ka kaiphod.
Ha ka jingshisha, u myntri rangbah ula ong mynshwa ba ka sorkar kan leit rah ia kane ka committee hapoh ka ïing dorbar thawain ka jylla.
Lah ban kdew ba ka sorkar jylla ka la thaw ia ka Expert Committee ban pule bniah ia ka bhah thungkam ha ka jylla hapdeng u Khasi-Jaintia bad u Garo hadien ba u bah Ardent ula pyllong ia ka jingiakhih shah thngan ban dawa pynkylla ia kane ka policy kaba ula ong ba ka dei kaba noh shiliang katkum ka jingbun briew ki Khasi-Jaintia bad Garo.
Sei noh ia ka kaiphod ka Expert Committee, la 5 bnai ka la slem, ong ka VPP ia ka sorkar
