Sohra: Ka Hima Sohra ka la ioh biang ia ka jingthang ia u Syiem hadien 99 snem naduh u snem 1926 haduh u snem 1925.
Secretary ka Hima Sohra u bah Bnoh V Rymbai ula iathuh ba u Syiem ba khadduh ba kan ioh pyndep ia ka niam ka rukom ka thang Syiem ha u snem 1926, ka dei ia u Syiem Robasing Syiem uba la khlad ha u snem 1918 bad la lah ban pyllong ia ka jingthang ha u snem 2016, kaba la long 8 snem. Ia ka met jong u, kila tep tynrong shwa, kaba mut tep shwa shipor haduh ban ioh thang pura katkum ka niam ka rukom ba la ioh ia u syiem ba pura.
Ia ka met u Syiem Robasing la thang da u Syiem Joinmanik Syiem ha ka 1926.
Hadien ka jingiap u Syiem Joinmanik Syiem ka Hima Sohra ha ka 1963, ka Hima kam shym la ioh shuh ia u Syiem ba la jied katkum ka riti dustur.
U Rodromanik Syiem ula long Acting Syiem da kaba thung ka District Council ha ka 18 tarik Naitung 1963 hynrei la mih ka jingpyrshah ia kane ka jingthung syiem da u Mehsing Syiem. Ha ka 14 tarik Lber 1966, la pyllong ia ka jingialang ki myntri bad ki nongjied bad ha kane ka jingialang bun ki myntri bad ki nongjied ne elector ki kyrshan ia u Mehsing Syiem. Hynrei ka District Council ka dang pynneh ia u Rodromanik Syiem kum u Acting Syiem.
Dei tad ha ka 21 tarik Rymphang 1973 ba ka KHADC ka la weng noh ia u Rodromanik Syiem bad ka la thung ia u Mehsing kum u Syiem.
Hynrei u Syiem Mehsing ula khlad ha ka 2 tarik Kyllalyngkot 1979 bad la ong ba shwa ba un khlad ula pdiang ia ka jinglong Khristan. Hadien ka jingiap jong u, ka KHADC ka la thung ia u Rosemohan Roy Khongwir kum u Acting Syiem hynrei la pynkut noh ia ka jinglong Syiem jongu ha ka snem 1981.
Hadien kane, la thung Acting Syiem ia u Paiem Freeman Sing Syiem ha ka 15 tarik Nailur, 1981. Ka KHADC ka la pyllong syiem pura ia u ha u snem 1983 tad haduh ba ula khlad noh ha ka 31 tarik Risaw 2025, kaba long kumba 44 snem ka jinglong Syiem jong u ha ka Hima Sohra.
Ha ka dorbar Syiem ka Hima kaba la iashong ar sngi lynter, ha ka 1 tarik bad 2 tarik Naiwieng 2025, ka la rai da kawei ka sur ban jied ia u Marremdor Syiem, u Syiem Khynnah ka Hima ba un kiew ia ka khet kum u Syiem ba pura ha jaka jong u Paiem Freeman Sing Syiem bad ia kane ka rai la pynsngew ha ka 3 tarik Naiwieng 2025.
Haba ka dorbar hima ka la mynjur ia u Marremdor kum u Syiem, bad un pyndep ia ka thang ia ka met basah u Syiem Freeman ha ka 5 tarik Naiwieng 2025.
Kumno ka jingthang syiem ka Hima Sohra hadien 99 snem ka jia long
