Shillong: Watla ka aiom tyrkhong ne ka aiom tlang ka la wan iuhkjat hynrei na ka liang ka sorkar ka la thaw lad tyngeh ban ym don satia ka jingpyllip ding ha ka jylla.
U myntri ka tnad bording ka jylla,u bah Metbah Lyngdoh ula ong ba ka MeECL kan pyni ia ka jingtbit jongka ba kam ym don eiei ka jingpyllip ding ha kine ki aiom tyrkhong.
U la ong ba un lum ia ki ophisar ban bishar bniah ia ka jinglong jingman ka bording ha ka jylla bad ula kam ba ka jingpyllip ding ha ki jaka bapher bapher ha ka jylla ha kine ki sngi, ka dei namar ba dang pynheh pynkhlain ia ki power station na ki sub-station.
U myntri ula ong ba ki don shibun ki skhim ha kaba ka jingtrei ka dang iaid bad na kane ka daw, la hap ban pyllip ding haba dang iaid ka jingshna tangba ka sorkar ka la pyntip lypa shwa ban pyllip ia ka ding.
Ha kajuh ka por, ula ong ba la iakren ruh ban pynjur ia ka jingpyndonkam ia ki ding sngi ne solar light bad ban buh ia ka solar power plant ha ka jylla khnang ban pynduna ia ka jingpyndonkam ia ka bording kiba pynmih na ki wah, u dewiong.
Dang shen, u bah Metbah ula iashim bynta ha ka jingiathir ka Renewable Energy–North Eastern Zone ha Guwahati ha kaba ka sorkar Meghalaya ka la pynkhreh ban buh 2000 tylli ki solar pump.
Halor ka jingbuh ia ki shatri tan ding na ka sngi ne solar panel, u bah Metbah ula ong ba ka la don ka jingeh namar ba ka sorkar India ka la buh pud ia ka jinglut hapdeng T.50000-55000 shi kilowatt hynrei ka jinglut pat ka la kot sha kaT.80000-85000 namar ba kane ka jylla ka long lum long them bad kane ka la pynkynrandien ia ki briew ban shim kabu na kane ka skhim.
Yn ym don jingpyllip ding por tyrkhong slap ruh, ong u myntri
