Shillong: Ka Dorbar Shnong Umshaken ryngkat bad ka Synjuk ki Rangbah Shnong Raid Mathan, ki seng paidbah bad ki nongshong shnong jong ka Raid Mathan ha Ri Bhoi District, ha ka jingsynran lang ka Kong Rona Khymdeit MDC ka Nongpoh, kila wan kiew khnang sha Secratariat, Shillong ban iakynduh ia u myntri ka tnad ka koit ka khiah u bah Wailadmiki Shylla hynrei kane ka la pulom noh hadien ba kim shym la ioh ban iakynduh na ka daw ba u myntri u donkam shawei pat.
Haba kren sha ki lad pathai khubor, u Bah S. Nongkseh Chairman Synjuk Rangbah Shnong Raid Mathan Secretary, ula ong ba ki la mut ban kynduh ia bad ban ai ka memorandum sha u Myntri ka Tnat Ka Koit ka Khiah ban pynkiew kyrdan noh ïa ka Umshaken Health & Wellness Centre (HWC) sha ka Public Health Centre (PHC).
Ka Umshaken Health & Wellness Centre ka dei ka jaka sumar ba donkam bha ha kane ka thain, kaba ai jingsumar ïa ki nongshong shnong na bun tylli ki shnong hapoh Umling C&RD Block, Ri Bhoi District, hynrei mynta, ka jaka sumar ka duna ha ka jingdon nongtrei bad ha ka jingdon jingtip, bad kam lah shuh ban pyndap ïa ka jingdonkam ka paidbah kaba la nang kiew na ka por sha ka por bad ruh ka jingdonkam ia ka Ambulance namar baroh shi katta ki shu wai ia ki kali ki briew ban kit dawai.
La kdew ruh ha ka memorandum ha u snem 2014, u Executive Engineer jong ka Tnat Health & Family Welfare u la leit jurip bad u la pyntreikam ïa ka file bad phah sha ka ophis DMHO Ri Bhoi bad sha ka ophis Secretary jong ka Tnat Health & Family Welfare, hynrei haduh mynta kam pat don ka jingmih eiei.
Pulom kwah kynduh myntri ka Raid Mathan ha Secretariat, ba mih kam kynsan u myntri
