Shillong: Ia ka lyngkhuh snem sngiiap bahynriewphew hynriew jong u Rev. J.J.M. Nichols Roy, la pynlong ha u motdur ha Lariti ban kynmaw kum uwei na ki riewkhraw ba don ka phangma ka ba sngur na ka bynta ka Ri Khasi bad ka lawei ki paidbynriew. Ka sngi sah kynmaw la pynkhreh da ka J.J.M. Nichols Roy Memorial Society, ha ka ba la pynlong jingdwai bad ai jingkren da jki dkhot ba kynthup ia u Bah Ransom Sutnga, kum u Shongknor Bah Robert Dkhar, Bah H. Suting, bad ka jingdwai na u Rev. B. Pohsngap. Hadien kata la buh syntiew ban kynmaw burom bad sien syntiew ia ki kam bakhraw jong u Rev J J M Nichols Roy. La pynkynmaw ba u Bah Joy dei uwei na ki rangbah ba long dkhot ha ka ba shna ia ka Riti Synshar ka Ri India, ka Constituent Assembly of India, bad u la thawaiñ ia ka Khyrnit Baphra na ka bynta ban iada ia ki riewlum baroh ha Ri India ka ba tip kum ka Sixth Schedule .
Ki nongkren baroh ha ka jingialang ki la pyrto ia u synñiang jong u Rev J J M Nichols Roy kum u ba la bniah sani ban shna ia ki kyndon aiñ baskhemm ba wat mynta ka Ladakh ba la ialam da u So\nam Wangchuk ki la ñiewkor ia kane ka atiar thawaiñ ba ki la dawa ban pyntreikam ha ka jaka jong ki.
La pynkynmaw ruh ba dang shen la shah kynnoh ba khllem bad tor ka jingshna ia u motdur u Rev J J M Nichols Roy ha ka ba la kdew kti ia ka Riti Academy, hynrei u Barikor rangbah Bah Raphael Warjri u la pynshai ba la shna kyrkieh na ka bynta ban rakhe ia ka dorbar Bah jong ki khlieh synshar ki Dorbar Thawaiñ Dalatiti na baroh kawei ka thaiñ ha ka 10 tarik Nailur 2024. la aipor tang da ki bnai ban bujli noh da ka jingtei baskhem hynrei la syntan da ka iktiar sorkar ban pynurlong haduh ba la sdang tor u motdur na ka daw ba la jlan palat.
Jar la katta la plie ia u motdur jong u Rev J J M Nichols Roy da u Bah Prestone Tynsong, Symbud Myntri Rangbah ha ka ba ia don lang u Bah Paul Lyngdoh, Myntri Mattithaw bad Deiriti ka Sorkar Jylla ha ka ba la ia don lang ki kynrem lyndan na baroh kawei ka thaiñ shatei lammihngi na ki Autonomous District Councils ba kynthup ia u Bah Pyniaid Sing Syiem (KHADC), Shri Pramod Boro (BTC), Shri Pradyot Manikya Debbarma (TTAADC), Shri Purna Chandra Jamatia (TTAADC), Shri M. Laikaw (Mara ADC), Shri Tukiram Ronghang (KAAC), Shri C. Lalmuanthanga (LAI ADC), Shri Rasik Mohan Chakma (Chakma ADC), Shri Thombor Shiwat (JHADC), Shri Albinush Marak (GHADC), Shri Lamphrang Blah, Shri Pynshngaiñlang N. Syiem, Shri Charles Marngar, bad Shri Titosstarwell Chyne, Nongialam Liang Pyrshah ha KHADC.
Na kata ka kynrum kynram ba shah kynnoh torti ia ka ba shna ia u motdur, u Bah Pyniaid Sing Syiem bad Bah Titosstarwell Chyne ki la aiti ha ka Riti Academyban pynbiang bad pynphuh pynphieng ha ka durmot ba shongkun bad la lah ban pyndep ia kata dang shen shwa ban rakhe ia ka lyngkhuh sngiiap ba 66 jong u Rev J J M Nichols Roy da ka ba phuh baphieng. U shongknor jong ka J J M Memorial, Bah Ransom Sutnga u la kren mardor ban kyntiew nam ia ka kyrteng jong u Bah Joy kum u riewstad bad u riewniam bakhraw u ba la kyntiew ia ka kyrdan jong ka jaitbynriew hakhmat jong kiwei kiwei ki paidbynriew ha Ri India.
Kynmaw Tympang ia U Rev. J.J.M. Nichols Roy ha ka Lyngkhuh Snem Bahynriewphew Hynriew
