Shillong: Katkum ka kaiphod ka Indian Oil Corporation, ki dang bun bah ki briew ne ki longïing ha ka jylla Meghalaya kiba dang thang da ka dieng ban shet jingshet.
Kane ka mut ba kim pat pyndonkam ne kim pat ioh ia ka tyndong shet LPG cylinder kaba la sam paidbah ka sorkar lyngba ka skhim Pradhan Mantri Ujjwala Yojana.
Katkum ka kaiphod ka sorkar kaba la pyni mynta ka sngi, ka jingdon kiba la ioh tyndong lyer shet ne LPG cylinder ki don 73.53 percent ha baroh kawei ka jylla.
Ha East Jaintia kiba la shet jingshet da ka tyndong lyer shet ki don 89. 53 percent, West Garo Hills ki don 85.82 percent, West Jaintia Hills ki don 79.09 percent, North Garo Hills ki don 83. 17 percent, South West Garo Hills ki don 73.19 percent, East Khasi Hills ki don 74.85 percent, East Garo Hills ki don 71.21 percent, South West Khasi hill ki don 55.96 percent, Ri-Bhoi ki don 60.84 percent, South Garo Hills ki don 62.01, Eastern West Khasi Hills ka don 41.2 percent, West Khasi Hills ki don 62.53 percent bad baroh ka jingdon kiba la shet tyndong lyer shet ki don 73.53 percent ha ka jylla.
Na ka liang u myntri u bah Methodius Dkhar ula kyntu ia ki paidbah ban leh Aadhaar na ka bynta ban ioh jingmyntoi na kane ka skhim ka sorkar India naduh ki mar bam reshon ruh kumjuh.
Na ka liang u Principal Secretary u Pravin Bakshi ula ong ba ka sorkar India lyngba ka jingbthah ka Supreme Court kila bthah ban don u Aadhaar na ka bynta kiba ioh jingmyntoi na ka skhim ka sorkar India bad na ka liang ka tnad ka dang thaw ia ki lad ki lynti ban pynsngewthuh ia ki paidbah halor kane ka jingdonkam.
Ka tnad Food, Civil Supplies & Consumer Affairs ka la pyllong mynta ka sngi, ka 28 tarik Risaw 2025 ia ka jingpyllait paidbah ia ka Aadhaar Mission Mode Project 2.0 bad ia ka Pradhan Mantri Ujjwala Yojana 3.0 shi bynta ban iathir ia ki jingeh bad kumno ban pynbeit ia kane.
Dang bun kiba thang dieng ha Meghalaya, ki bym pat ioh tyndong shet LPG
