Shillong: Ka Mawkynrew LP & Upper Primary School kala ïoh ïa ka ïingskul kaba thymmai hadien 39 snem naduh ba la sdang ïa ka ha u snem 1986
Ïa kane ka ïing skul thymmai la plie da u MLA bad MDC barim ka thaiñ Bah Martle N Mukhim mynta ka sngi, ha ka jingdon lang ki nongkitkam ka Managing Committee, Tymmen Basan, ki nonghikai, ki khynnah skul bad ki kmie ki kpa.
Ïa ka ïing skul thymmai la sdang ban pynwandur ha u snem 2008 ha ka por ba dang long MLA u Bah Martle hynrei kala sahteng noh hadien ba ula rem elekshon bad dei hadien ba ula jop biang kum u MDC ha u 2019, ula ïoh ban pynïoh biang na ka skhim ban pyndep ïa ka ïing skul.
Ha kane ka sngi, u Bah Martle ula plie ruh ïa ka paiñkhana jong ka Balang ha syndah ka ïing mane, ban pynsuk ïa kiba wan jingïaseng bad ha kiwei kiwei ki jingdonkam.
Haba kren ha ka jingïalang, u Bah Martle ula pynpaw ïa ka jingsngew khia hadien ba u khlem ïoh lad shuh ban bteng ïa ka kam ha ki snem ba la dep hynrei ula sngew kmen pat ba ula ïoh biang ïa ka lad ban ïohi ïa kane ka skul kaba ula angnud kan ïoh ïa ka ïing thymmai. U la kyntu ïa ki nonghikai ki bor pynïaid skul ban ïathir ïatai na ka bynta ka jingbha ym ban ïa mut ne leh ïa kaban pyntroiñ pynban ïa ka skul.
La ïoh ruh ki jingkren na u President ka Managing Committee, na u Tymmbasan, Secretary ka Managing Committee, na ki longkmie bad la nang pynphuh pynphieng ïa kane ka sngi da ki jingrwai bad jingshad na ki khynnah skul.
Hadien 39 snem ïoh ka Mawkynrew Presbyterian LP&UP School ïa ka ïing skul ba thymmai | Plie u Bah MN Mukhim
