Shillong: Ka sorkar jylla ka la pynkhreh bha ban pynlynguh ia ka tamasa dieng Japan ne Cherry Blossom ha ka 14 bad 15 tarik u Naiwieng ha JN Stadium, Polo.
Ha kane ka tamasa yn wan ki kynhun nongtem nongrwai ba pawnam ka pyrthei kynthup ka The Script, Jason Derulo, bad ka Nora Fatehi ha ka 14 tarik bad ka kynhun Aqua bad Tyga ha ka 15 tarik.
U myntri rangbah ka jylla u Conrad K Sangma ula pynbna mynta ka sngi, ka 31 tarik Risaw 2025, ba kan don ruh ka khubor sngewlem ia u nongrwai ka Assam uba la khlad dang shen, u Zubeen Garg.
Nalor ki nongtem ki nongrwai nabar ri, kin don ruh na kane ka ri bad na kane ka jylla kum ka Meba, Ophelia, Dappest X ADL bad kiwei.
Kin don ruh ki jingpyni bad jingiakop kum ka Mr. bad Miss Cherry Blossom, ka arm wrestling bad kiwei ki jingpynbang bad jingpynbyrngia ia ki paidbah.
Katkum ka jingong u myntri rangbah kumba 50 hajar ngut eiei kiba wankai nabar kin wan ban sakhi ha kane ka tamasa.
Halor ka jingiadei bad ki eksamin kiba ktah ia ki khynnah, u Conrad ula ong ba ka sorkar kan pyrshang ban pynduna ia ka jingpynwit katba lah.
Ka jingmut jong kane ka tamasa ka long ban khring ia ki nongwankai sha kane ka jylla, ym dei tang na ka bynta ka kam tamasa.
Yn tdem ka madan phutbol ha Polo da ka sur jingrwai bad jingtep Cherry Blossom
