Shillong: Ka sorkar jylla ka la buh thong ban pyllong ia ka nongbah Shillong kaba khuid tam bad kaba shngain ha ka thain Nort East bad kaba sngew tynnad ia ki briew ban sah ban im.
Shi bynta halor kane, mynta ka sngi ka 31 tarik Risaw 2025, ka sorkar hapoh ka jingialam u myntri rangbah u Conrad K Sangma ryngkat u Symbud Myntri Rangbah bah Sniawbhalang Dhar kila lum ia ki rangbah shnong jong ka nongbah Shillong ban iathir iatai halor kane.
Ha kane ka Mission Clean Shillong 2027 ha kaba ka jylla kan pdiang ia ka National Games, u myntri rangbah ula pynsngew ia ki mat ba ka sorkar ka la buh thong kynthup ban pynkhuid ia ki wah ha sawdong ka sor Shillong, ka jingpynkylla sboh ia ki jaboh na marten kaba 3.5 lak ton, ka jingbuh ia ki 250 tylli ki CCTV ha ki 48 tylli ki jaka ha ka nongbah khamtam ha kiba kham mih ki kam runar bad kumjuh ka jingbuh ia ki street light ha kylleng ha ka nongbah.
Katkum ka jingong u myntri rangbah, ki CCTV kin treikam ha u bnai Naiwieng mynta u snem.
Ha kane ka jingialang, u myntri rangbah ula sam ruh ia ka pisa sha ki 14 tylli ki dorbar shnong na ka bynta ban pynitynnad ia ki shnong jongki da ki jingdro. Ka sorkar ka la pynkhreh ruh ban shna bha ia ki jaka leit bar ki paidbah kylleng ki jaka.
La iathir ruh ban pynkhlain ia ki nongpahara shnong kum ki Village Defense Party (VDP) ban tehlakam ia ki kam sniew.
Yn pyllong ia ka Shillong kaba khuid tam | 3.5 lak ton ka jaboh marten yn pynkylla sboh, 250 ki CCTV ha 48 tylli ki jaka
