Shillong: U President ka MPCC u la ong ba ha ka party ki don beit kiba kwah ban weng ia u bad kiba kwah ba un neh.
Namar ba ka kam President ka dei tang kawei, kin don beit kiba mon bad kin don bym mon ruh bad ki don ki briew kiba la phet na ka party, ki lah ban pyndonkam bakla ia ki briew jongki ban pynshit ban weng ia u.
Hynnin ka sngi ruh ha ka jingialang kaba don lang uba peit ia ka Meghalaya na ka AICC, u bah Pala ula ong ba ki don kiba ong ba dei ban shim ia ka rai ban khang ban kren ia kane ka jingpynpaw pyrshah ban weng ia u hynrei na ka liang jong u, um shah namar ba ha ka party kaba don ka synshar paidbah, ki lah ban pynpaw ia kano kano ka jingsngew jongki.
U la ong ba ula kular ha kiba pynsngew ban pynthymmai ia ki nongkitkam ka party kum ha ki district bad ki Block ruh bad ula pan jingbit ruh na ka party na ka AICC halor kane.
Ula ong ba ka jingdawa jongki, ka long kaba dei ban pynbha ia ka party hynrei ban dawa ban pynhiar dor ia ka party te, ym lah ban pdiang. Ula ong ba don ruh ki briew ka party kiba pynshit khnang ban ioh daw ban leit sha ka BJP bad kum kine, ym lah ban pdiang. Hynrei um kwah ban pynpaw ia kita ki briew.
Ula iathuh ba u bah Pynshngain N Syiem ula kynduh ia ki nongialam ka AICC bad kila bthah ia u ban iatreilang bad iatylli ha ka party. U bah Pala ula ong ba lehse u bah Pynshngain u sngew dom namar ba ha ka por ba ki kwah ban iathaw lang ha ka EC bad ka NPP ha KHADC, um shym la shah ba kin iatreilang hynrei hadien ba kila pyneh ba ki kwah ban iatreilang bad ka NPP, bad na ka liang jongu kum u President ka MPCC ula u shu sngap noh. Ka jingiatreilang ka Congress bad ka NPP ka la ktah ia ka party ha ka MDC elekshon ha KHADC bad ka JHADC.
Pynshit kiba thmu rung BJP ban weng ia nga na ka kam President ka MPCC: Pala
