Shillong: Ia ka Shillong Engineering college la plie mynta ka sngi ha kaba ka kynhun pule ba nyngkong ka la sdang mynta ka snem.
Da ka jingdon ka engineering college hapoh ka jylla, ki samla kim donkam shuh ban leit pule shabar lait noh tang ki jait jingpule ki bym pat don ha kane ka college.
Ia kane ka college la plie u myntri rangbah u Conrad K Sangma mynta ka sngi ka 31 tarik Risaw 2025 ha Mawlai Kynton Massar ha ka jingdon lang u symbud myntri rangbah bah Prestone Tynsong, u myntri ka tnad pule puthi bah Lahkmen Rymbui bad kiwei.
Haba kren ha kane ka jingplie, u Conrad ula ong ba ka jingsdang slem ia kum kane ka college kam mut ba la shu ieh shadien.
U la ong ba ki kompeni nabar kila kloi ban bei pisa ha kane ka jylla bad ula ong ba ki briew ka kompeni Nvidia na America kaba shna ia ki chip, bad ki graphics processing units kila wan jngoh ia ka Shillong ban iasnohkti bad ka sorkar.
Ka sorkar ka la bei pisa ban ai jinghikai na ka bynta 50 ngut ki samla ha ka artificial intelligence, computer bad engineering.
Ha kajuh ka por, u la ong ba ka bynta baar ka Shillong IT Park yn plie ha u Nohprah ha kaba kumba 3 hajar ngut ki samla kin ioh kam bad ka kompeni na UK ka la pynpaw ia ka jingkloi ban sdang ia ka jingtreikam ha nongbah Shillong.
Ha ka klas ba nyngkong, kin don 50 ngut ki samla ban ioh pule ha kane ka Engineering College.
Ka college pule enjiniar ha tyngkong ïing, pynsuk ia ki samla ka jylla
